ek viran ganw mein

inhī sūkhe hue maidānoñ meñ

ab jahāñ dhuup kī lahroñ ke sivā kuchh bhī nahīñ

sabz lahrāte hue khet huā karte the

log ābād the peḌoñ kī ghanī chhāñv meñ

mahfileñ jamtī thiiñ afsāne sune jaate the

aaj vīrān makānoñ meñ havā chīḳhtī hai

dhuul meñ uḌte kitāboñ ke varaq

kis kī yādoñ ke varaq kis ke ḳhayāloñ ke varaq

mujh se kahte haiñ ki rah jaao yahīñ

aur maiñ sochtā huuñ sirf añdherā hai yahāñ

phir havā aatī hai dīvānī havā

aur kahtī hai: nahīñ sirf añdherā to nahīñ

yaad haiñ mujh ko vo lamhe jin meñ

log āzād the aur zinda the

aao maiñ tum ko dikhā.ūñ vo maqām.....

ek vīrān jagah īñToñ kā ambār nahīñ kuchh bhī nahīñ

aur vo kahtī hai ye pyaar kā markaz thā kabhī

kis kī yaad aa.e mujhe kis kī batāo kis kii!

aur ab chup hai havā chup hai zamīñ

bol ai vaqt! kahāñ haiñ vo log

jin ko vo yaad haiñ jin kī yādeñ

in havāoñ meñ pareshān haiñ aaj

inhi sukhe hue maidanon mein

ab jahan dhup ki lahron ke siwa kuchh bhi nahin

sabz lahraate hue khet hua karte the

log aabaad the peDon ki ghani chhanw mein

mahfilen jamti thin afsane sune jate the

aaj viran makanon mein hawa chiKHti hai

dhul mein uDte kitabon ke waraq

kis ki yaadon ke waraq kis ke KHayalon ke waraq

mujh se kahte hain ki rah jao yahin

aur main sochta hun sirf andhera hai yahan

phir hawa aati hai diwani hawa

aur kahti hai: nahin sirf andhera to nahin

yaad hain mujh ko wo lamhe jin mein

log aazad the aur zinda the

aao main tum ko dikhaun wo maqam

ek viran jagah inTon ka ambar nahin kuchh bhi nahin

aur wo kahti hai ye pyar ka markaz tha kabhi

kis ki yaad aae mujhe kis ki batao kis ki!

aur ab chup hai hawa chup hai zamin

bol ai waqt! kahan hain wo log

jin ko wo yaad hain jin ki yaaden

in hawaon mein pareshan hain aaj