ek zanjir-e-girya mere sath thi

maiñ gayā us taraf

jis taraf niiñd thī

jis taraf raat thī

band mujh par hue saare dar

saare ghar

maiñ gayā us taraf

jis taraf tiir the

jis taraf ghaat thī

mujh pe markūz thī ik nigāh-e-siyah

aur ajab zāviye se

banā.e hue thī mujhe

sar se pā tak hadaf

maiñ gayā us taraf

jis taraf ret kī lahr thī

mauj-e-zarrāt thī

maiñ nahīñ jāntā

us ghaḌī

tīrgī ke tilismāt meñ

jo ishāra huā

kis kī uñglī kā thā

aur jo kholī ga.ī thī mire qalb par

kaun sī baat thī

sirf itnā mujhe yaad hai

jab maiñ aage baḌhā

ek zanjīr-e-girya mire saath thī

maiñ parinda banā

merī parvāz ke dā.ere ne janā

ek saaya ghanā

kashf hone lagā

maiñ hare pāniyoñ meñ

badan kā sitāra Dubone lagā

aur ik lā-ta.ayyun subuk niiñd sone lagā

ik uḌan-tashtarī ban ga.ī sā.ebāñ

maiñ jahāñ thā vahāñ thā kahāñ āsmāñ

ek sho.ala thā bas mere hoñToñ se laf

maiñ gayā us taraf

jis taraf jism-o-jāñ kī havālāt thī

jis taraf niiñd thī

jis taraf raat thī

chaar jānib bichhī thī bisāt-e-adam

darmiyāñ jis ke

tanhā mirī zaat thī

main gaya us taraf

jis taraf nind thi

jis taraf raat thi

band mujh par hue sare dar

sare ghar

main gaya us taraf

jis taraf tir the

jis taraf ghat thi

mujh pe markuz thi ek nigah-e-siyah

aur ajab zawiye se

banae hue thi mujhe

sar se pa tak hadaf

main gaya us taraf

jis taraf ret ki lahr thi

mauj-e-zarraat thi

main nahin jaanta

us ghaDi

tirgi ke tilismat mein

jo ishaara hua

kis ki ungli ka tha

aur jo kholi gai thi mere qalb par

kaun si baat thi

sirf itna mujhe yaad hai

jab main aage baDha

ek zanjir-e-girya mere sath thi

main parinda bana

meri parwaz ke daere ne jana

ek saya ghana

kashf hone laga

main hare paniyon mein

badan ka sitara Dubone laga

aur ek la-tayyun subuk nind sone laga

ek uDan-tashtari ban gai saeban

main jahan tha wahan tha kahan aasman

ek shoala tha bas mere honTon se laf

main gaya us taraf

jis taraf jism-o-jaan ki hawalat thi

jis taraf nind thi

jis taraf raat thi

chaar jaanib bichhi thi bisat-e-adam

darmiyan jis ke

tanha meri zat thi