ekta

har balā se māvarā hai ektā

mulk-o-millat kī baqā hai ektā

buz-diloñ kā kaam hai buġhz-o-inād

ahl-e-himmat kī adā hai ektā

ektā hai maḳhzan-e-sad-imbisāt

ranj se nā-āshnā hai ektā

abr-e-rahmat hai ye apnoñ ke liye

ġhair ke haq meñ balā hai ektā

duur kartī hai diloñ se tīrgī

mamba.a-e-nūr-e-ḳhudā hai ektā

tafraqa hai zahr qaumoñ ke liye

chashma-e-āb-e-baqā hai ektā

phūltī phaltī haiñ is se bastiyāñ

zāmin-e-nashv-o-numā hai ektā

is ke dāman meñ hai amn-o-āfiyat

har musībat kī davā hai ektā

jabr-o-istibdād kī dushman hai ye

be-kasoñ kā aasrā hai ektā

dushmanān-e-hurriyat ke vāste

ek tīr-e-be-ḳhatā hai ektā

ektā se qaum-o-millat kā faroġh

qaumiyat kī intihā hai ektā

ektā hai har payambar kā payām

barbat-e-haq kī navā hai ektā

har bala se mawara hai ekta

mulk-o-millat ki baqa hai ekta

buz-dilon ka kaam hai bughz-o-inad

ahl-e-himmat ki ada hai ekta

ekta hai maKHzan-e-sad-imbisat

ranj se na-ashna hai ekta

abr-e-rahmat hai ye apnon ke liye

ghair ke haq mein bala hai ekta

dur karti hai dilon se tirgi

mamba-e-nur-e-KHuda hai ekta

tafraqa hai zahr qaumon ke liye

chashma-e-ab-e-baqa hai ekta

phulti phalti hain is se bastiyan

zamin-e-nashw-o-numa hai ekta

is ke daman mein hai amn-o-afiyat

har musibat ki dawa hai ekta

jabr-o-istibdad ki dushman hai ye

be-kason ka aasra hai ekta

dushmanan-e-hurriyat ke waste

ek tir-e-be-KHata hai ekta

ekta se qaum-o-millat ka farogh

qaumiyat ki intiha hai ekta

ekta hai har payambar ka payam

barbat-e-haq ki nawa hai ekta