elan nama

maiñ laakh buzdil sahī magar maiñ usī qabīle kā aadmī huuñ ki jis ke beToñ ne

jo kahā us pe jaan de dī

maiñ jāntā thā mire qabīle kī ḳhema-gāheñ jalā.ī jā.eñgī aur tamāshā.ī

raqs-e-sho.ala-fishāñ par isrār hī kareñge

maiñ jāntā thā mirā qabīla burīda aur be-ridā saroñ kī gavāhiyāñ

le ke aa.egā phir bhī log inkār hī kareñge

so maiñ kamīñ-gāh-e-āfiyat meñ chalā gayā thā

so maiñ amāñ-gāh-e-maslahat meñ chalā gayā thā

aur ab mujhe mere shahsavāroñ kā ḳhuun āvāz de rahā hai

to nazr-e-sar le ke aa gayā huuñ

tabāh hone ko ek ghar le ke aa gayā huuñ

maiñ laakh buzdil sahī magar maiñ usī qabīle kā aadmī huuñ!

main lakh buzdil sahi magar main usi qabile ka aadmi hun ki jis ke beTon ne

jo kaha us pe jaan de di

main jaanta tha mere qabile ki KHema-gahen jalai jaengi aur tamashai

raqs-e-shoala-fishan par israr hi karenge

main jaanta tha mera qabila burida aur be-rida saron ki gawahiyan

le ke aaega phir bhi log inkar hi karenge

so main kamin-gah-e-afiyat mein chala gaya tha

so main aman-gah-e-maslahat mein chala gaya tha

aur ab mujhe mere shahsawaron ka KHun aawaz de raha hai

to nazr-e-sar le ke aa gaya hun

tabah hone ko ek ghar le ke aa gaya hun

main lakh buzdil sahi magar main usi qabile ka aadmi hun!