faslon ki baat

tum ne fāsloñ kī baat samajh lī to tumheñ yaad aa.egā

ki fanā ham sab kī taqdīr hai

tumheñ ma.alūm hai? tumhāre

ghar kī sīḌhiyāñ chaḌhte hue maiñ ne hazār baar

chup-chāp

ziine kī safed dīvāroñ pe uñgliyāñ pherī haiñ

is ummīd meñ ki shāyad lams ke

aise zā.iqe vahāñ rah jaa.eñ jo tum hamesha

badan ke gunjalak aur be-lafz

zā.iqoñ kī tarah pahchān sako

aur yaad rakho

ab samajh meñ aane lagā hai

ki koī nazm kabhī ishq aur dard kī asl zarūriyāt

puurī nahīñ kartī

ki ishq maut ke ḳhilāf hathiyār nahīñ

ki hamāre lafz hamāre maqāsid se nā-āshnā haiñ

ki mujhe chāhat us shaḳhs kī hai jo tum ho

ki maiñ mukammal taur pe tumheñ

kabhī na jaan pā.ūñgā

aur tum ne ye tamām muddat

ḳhud apne mafhūm kī talāsh meñ sulagte pighalte

guzārī hai

tum ne faslon ki baat samajh li to tumhein yaad aaega

ki fana hum sab ki taqdir hai

tumhein malum hai? tumhaare

ghar ki siDhiyan chaDhte hue main ne hazar bar

chup-chap

zine ki safed diwaron pe ungliyan pheri hain

is ummid mein ki shayad lams ke

aise zaiqe wahan rah jaen jo tum hamesha

badan ke gunjalak aur be-lafz

zaiqon ki tarah pahchan sako

aur yaad rakho

ab samajh mein aane laga hai

ki koi nazm kabhi ishq aur dard ki asl zaruriyat

puri nahin karti

ki ishq maut ke KHilaf hathiyar nahin

ki hamare lafz hamare maqasid se na-ashna hain

ki mujhe chahat us shaKHs ki hai jo tum ho

ki main mukammal taur pe tumhein

kabhi na jaan paunga

aur tum ne ye tamam muddat

KHud apne mafhum ki talash mein sulagte pighalte

guzari hai