faisla

ab ke dīvār meñ darvāza rakhūñ yā na rakhūñ

ajnabī phir na koī darpai-e-āzār aa jaa.e

ek dastak meñ mirī saarī fasīleñ Dhā jaa.e

ab ke dīvār meñ darvāza rakkhūñ yā na rakhūñ

ek ahrām na chun luuñ sifat-e-dūd-e-harīr

koī aa.e to bas ik gumbad-e-dar-bastā mile

rāz-e-sar-basta mile

laakh sar phoḌe sadā koī na mujh tak pahuñche

qāsid-e-mauj-e-havā koī na mujh tak pahuñche

ab ke dīvār meñ darvāza rakkhūñ yā na rakhūñ

saare andeshe magar ek taraf

ek taraf terī ummīd

jaane kis vaqt idhar terī savārī aa jaa.e

ajnabī laakh koī merī fasīleñ Dhā jaa.e

mujh ko dīvār meñ darvāza lagānā hogā

ab ke diwar mein darwaza rakhun ya na rakhun

ajnabi phir na koi darpai-e-azar aa jae

ek dastak mein meri sari fasilen Dha jae

ab ke diwar mein darwaza rakkhun ya na rakhun

ek ahram na chun lun sifat-e-dud-e-harir

koi aae to bas ek gumbad-e-dar-basta mile

raaz-e-sar-basta mile

lakh sar phoDe sada koi na mujh tak pahunche

qasid-e-mauj-e-hawa koi na mujh tak pahunche

ab ke diwar mein darwaza rakkhun ya na rakhun

sare andeshe magar ek taraf

ek taraf teri ummid

jaane kis waqt idhar teri sawari aa jae

ajnabi lakh koi meri fasilen Dha jae

mujh ko diwar mein darwaza lagana hoga