fan

vo shāḳh mazbūt ho yā nāzuk

ye munhasir hai kamāl-e-fan par

ki kaise tinkoñ ko joḌnā hai

mahīn reshoñ ke tāne-bāne

se kaise dīvār joḌnī hai

kahāñ banānā hai dar kahāñ par

jagah darīche kī chhoḌnī hai

jahāñ se bād-e-sabā to aa.e

darūn-e-ḳhāna chale jo āñdhī

girāne paa.e na āshiyāna

ḳhulūs-o-uns-o-vafā kī ruī

yaqīn-o-īsār ke anāsir

jo hoñge ta.amīr meñ ye shāmil

to shāḳh-e-nāzuk pe banñe vaalā bhī

āshiyāñ pā.edār hogā

wo shaKH mazbut ho ya nazuk

ye munhasir hai kamal-e-fan par

ki kaise tinkon ko joDna hai

mahin reshon ke tane-bane

se kaise diwar joDni hai

kahan banana hai dar kahan par

jagah dariche ki chhoDni hai

jahan se baad-e-saba to aae

darun-e-KHana chale jo aandhi

girane pae na aashiyana

KHulus-o-uns-o-wafa ki rui

yaqin-o-isar ke anasir

jo honge tamir mein ye shamil

to shaKH-e-nazuk pe banne wala bhi

aashiyan paedar hoga