fankar

is bhare shahr meñ har chiiz kī qīmat Thahrī

dard bik jaate haiñ jazbāt bikā karte haiñ

jagmagāte hue sikkoñ ke evaz duniyā meñ

kitne shā.er haiñ jo din raat bikā karte haiñ

ik tirā shā.er-e-ḳhuddār nahīñ bik saktā

merī mahbūb tirā pyaar nahīñ bik saktā

mere ḳhākoñ meñ tire husn kī tasvīreñ haiñ

jumbish-e-zulf tirī jumbish-e-lab terī hai

merā haq kyā hai jo nīlām uThā.ūñ in kā

mere ash.ār vo daulat hai jo ab terī hai

ab ye sarmaya-e-ash.ār nahīñ bik saktā

merī mahbūb tirā pyaar nahīñ bik saktā

apne she.roñ kā chaman nazr kiyā hai tujh ko

apnā andāz-e-suḳhan nazr kiyā hai tujh ko

dhaḌkaneñ mere javāñ dil kī basī haiñ jis meñ

maiñ ne vo fikr vo fan nazr kiyā hai tujh ko

kisī fankār kā kirdār nahīñ bik saktā

merī mahbūb tirā pyaar nahīñ bik saktā

is bhare shahr mein har chiz ki qimat Thahri

dard bik jate hain jazbaat bika karte hain

jagmagate hue sikkon ke ewaz duniya mein

kitne shaer hain jo din raat bika karte hain

ek tera shaer-e-KHuddar nahin bik sakta

meri mahbub tera pyar nahin bik sakta

mere KHakon mein tere husn ki taswiren hain

jumbish-e-zulf teri jumbish-e-lab teri hai

mera haq kya hai jo nilam uThaun in ka

mere ashaar wo daulat hai jo ab teri hai

ab ye sarmaya-e-ashaar nahin bik sakta

meri mahbub tera pyar nahin bik sakta

apne sheron ka chaman nazr kiya hai tujh ko

apna andaz-e-suKHan nazr kiya hai tujh ko

dhaDkanen mere jawan dil ki basi hain jis mein

main ne wo fikr wo fan nazr kiya hai tujh ko

kisi fankar ka kirdar nahin bik sakta

meri mahbub tera pyar nahin bik sakta