farozan sitara

suno baat ik roz kī maiñ batā.ūñ

kahānī tumheñ aaj us kī sunā.ūñ

mire sāmne jo kisī se na laḌtā

vahī ek laḌkā jo mujh pe thā martā

zamīñ pe jise thā falak se utārā

shakar-lab vo gul thā farozāñ sitārā

jise dekh bādal ne kī chashm pur-nam

fazā meñ thī rangīniyāñ aur sargam

thī siipī sī āñkheñ gulābī sā chehra

ki jaise nadī meñ kahīñ chāñd Thahrā

ġhazal vo thā kahtā mirī shoḳhiyoñ pe

mujhe thā chiḌhātā merī ġhaltiyoñ pe

siyānā bahut aur thoḌā sā nādāñ

anā jaise parvat thī muskān maidāñ

hathelī pe merī jo sau baar soyā

mire sāmne thā sisak kar vo royā

yahī baat mujh se vo kahtā thā aksar

parī apsarā yā ho tum hūr-paikar

parastish ho merī tumhīñ shā.erī ho

mohabbat sanam tum mirī āḳhirī ho

vo chupke se mujh ko yuuñ paiġhām detā

hathelī kī larzish ko thā thaam letā

ishāroñ meñ kahtā thā jo baat dil kī

kahānī hai ye us dil-e-mushta.il kī

anā bhī thī roī thā royā añdherā

ḳhabar us ke jaane kī laayā saverā

thā tūfān aaya ghaTā mailī chhā.ī

kabhī baat dil kī maiñ kah phir na paa.ī

sazā chāhtī huuñ ḳhatā-kār huuñ maiñ

muqaddar nahīñ par tirā pyaar huuñ maiñ

parastish nahīñ maiñ na hī shā.erī huuñ

mohabbat maiñ lekin tirī āḳhrī huuñ

suno baat ek roz ki main bataun

kahani tumhein aaj us ki sunaun

mere samne jo kisi se na laDta

wahi ek laDka jo mujh pe tha marta

zamin pe jise tha falak se utara

shakar-lab wo gul tha farozan sitara

jise dekh baadal ne ki chashm pur-nam

faza mein thi ranginiyan aur sargam

thi sipi si aankhen gulabi sa chehra

ki jaise nadi mein kahin chand Thahra

ghazal wo tha kahta meri shoKHiyon pe

mujhe tha chiDhata meri ghaltiyon pe

siyana bahut aur thoDa sa nadan

ana jaise parwat thi muskan maidan

hatheli pe meri jo sau bar soya

mere samne tha sisak kar wo roya

yahi baat mujh se wo kahta tha aksar

pari apsara ya ho tum hur-paikar

parastish ho meri tumhin shaeri ho

mohabbat sanam tum meri aaKHiri ho

wo chupke se mujh ko yun paigham deta

hatheli ki larzish ko tha tham leta

ishaaron mein kahta tha jo baat dil ki

kahani hai ye us dil-e-mushtail ki

ana bhi thi roi tha roya andhera

KHabar us ke jaane ki laya sawera

tha tufan aaya ghaTa maili chhai

kabhi baat dil ki main kah phir na pai

saza chahti hun KHata-kar hun main

muqaddar nahin par tera pyar hun main

parastish nahin main na hi shaeri hun

mohabbat main lekin teri aaKHri hun