fawwara

aah favvāre tire dil meñ hai kitnā iztirāb

har ghaḌī hai zindagī terī rahīn-e-inqalāb

kis qadar hai dil meñ tere iltihāb-o-inshiqāq

kyā tujhe bhī hai kisī se shikva-e-ranj-e-firāq

hai tirī hastī bhī kyā andoh kī sarmāya-dār

kyā tirā dil bhī vafūr-e-ranj se hai be-qarār

kyā tujhe bhī intizār-e-āmad-e-mahbūb hai

kyoñ pareshāñ is qadar hai kyā tujhe matlūb hai

uf tire motī se aañsū jā rahe haiñ rā.egāñ

haañ magar tujh ko mohabbat meñ ḳhayāl is kā kahāñ

haañ magar pinhāñ hai in ashkoñ meñ ik rāz-e-hayāt

de rahā hai qurb ke paudoñ ko tū apne sabāt

kaash lete tujh se ye insān bhī dars-e-amal

phir dimāġhoñ meñ na rahtā is qadar un ke ḳhalal

aah fawware tere dil mein hai kitna iztirab

har ghaDi hai zindagi teri rahin-e-inqalab

kis qadar hai dil mein tere iltihab-o-inshiqaq

kya tujhe bhi hai kisi se shikwa-e-ranj-e-firaq

hai teri hasti bhi kya andoh ki sarmaya-dar

kya tera dil bhi wafur-e-ranj se hai be-qarar

kya tujhe bhi intizar-e-amad-e-mahbub hai

kyon pareshan is qadar hai kya tujhe matlub hai

uf tere moti se aansu ja rahe hain raegan

han magar tujh ko mohabbat mein KHayal is ka kahan

han magar pinhan hai in ashkon mein ek raaz-e-hayat

de raha hai qurb ke paudon ko tu apne sabaat

kash lete tujh se ye insan bhi dars-e-amal

phir dimaghon mein na rahta is qadar un ke KHalal