fursat ki tamanna mein

yuuñ vaqt guzartā hai

fursat kī tamannā meñ

jis tarah koī pattā

bahtā huā dariyā meñ

sāhil ke qarīb aa kar

chāhe ki Thahar jā.ūñ

aur sair zarā kar luuñ

us aks-e-moshajjar kī

jo dāman-e-dariyā par

zebā.ish-e-dariyā hai

yā baad kā vo jhoñkā

jo vaqf-e-ravānī hai

ik baaġh ke goshe meñ

chāhe ki yahāñ dam luuñ

dāman ko zarā bhar luuñ

us phuul kī ḳhushbū se

jis ko abhī khilnā hai

fursat kī tamannā meñ

yuuñ vaqt guzartā hai

afkār ma.īshat ke

fursat hī nahīñ dete

maiñ chāhtā huuñ dil se

kuchh kasb-e-hunar kar luuñ

gul-hā-e-mazāmīñ se

dāmān-e-suḳhan bhar luuñ

hai baḳht magar vāzhūñ

fursat hī nahīñ miltī

fursat ko kahāñ DhūñDūñ

fursat hī kā ronā hai

phir jī meñ ye aatī hai

kuchh aish hī hāsil ho

daulat hī mile mujh ko

vo kaam koī sochūñ

phir sochtā ye bhī huuñ

ye sochne kā dhandā

fursat hī meñ honā hai

fursat hī nahīñ dete

afkār ma.īshat ke

yun waqt guzarta hai

fursat ki tamanna mein

jis tarah koi patta

bahta hua dariya mein

sahil ke qarib aa kar

chahe ki Thahar jaun

aur sair zara kar lun

us aks-e-moshajjar ki

jo daman-e-dariya par

zebaish-e-dariya hai

ya baad ka wo jhonka

jo waqf-e-rawani hai

ek bagh ke goshe mein

chahe ki yahan dam lun

daman ko zara bhar lun

us phul ki KHushbu se

jis ko abhi khilna hai

fursat ki tamanna mein

yun waqt guzarta hai

afkar maishat ke

fursat hi nahin dete

main chahta hun dil se

kuchh kasb-e-hunar kar lun

gul-ha-e-mazamin se

daman-e-suKHan bhar lun

hai baKHt magar wazhun

fursat hi nahin milti

fursat ko kahan DhunDun

fursat hi ka rona hai

phir ji mein ye aati hai

kuchh aish hi hasil ho

daulat hi mile mujh ko

wo kaam koi sochun

phir sochta ye bhi hun

ye sochne ka dhanda

fursat hi mein hona hai

fursat hi nahin dete

afkar maishat ke