fusun-e-KHwab

ba-rañg-e-kaif-o-sarshārī hadīs-e-dil kaho hamdam!

hama-tan gosh hai saa.at

sharāb-e-shab utartī hai bahut āhista āhista

sifāl-e-ḳhvāb meñ maddham

tumheñ is pal ijāzat hai

kaho! yuuñ ḳhalvat-e-jāñ meñ bilorīñ chūḌiyāñ chhan chhan chhanaktī shor kartī haiñ

mirā dil Dol jaatā hai

vufūr-e-husn meñ lipTī tumhārī ambarīñ zulfeñ...

dhḌaknā bhuul jaatā hai

kaho! kājal siyah kājal dhanak rañgoñ kā mela hai

kaho! poreñ ḳhayāloñ kī sunahrī jild meñ jalte diyoñ par raqs kartī haiñ

surāhī-dār gardan par damaktī nuqra.ī mālā... tumhāre kaan kī bālī... ye jādūgar!

ye ishva-gar

talab kī be-zabānī ko atā karte haiñ goyā.ī

tumheñ is pal ijāzat hai

kaho yuuñ bhed ke jaise saraktā raat kā āñchal havā meñ sarsarātā hai

sitārā shauq kā merī nazar meñ jhilmilātā hai

kaho! nā mausam-e-gul hai, gulāboñ kī qatāroñ meñ damakte shabnamī lamhe

tumhāre lams ke pyāse

bahr mauj-e-nafas Thahrā sukūt-e-shauq kā mausam tumheñ āvāz detā hai

tamannā giit kī sūrat laboñ par gungunātī hai

mohabbat be-muhābā ek lamhe ko tarastī hai

tamannā be-ḳhabar! ġhāfil...

fusūn-e-ḳhvāb kī muddat bahut thoḌī bahut kam hai

ba-rang-e-kaif-o-sarshaari hadis-e-dil kaho hamdam!

hama-tan gosh hai saat

sharab-e-shab utarti hai bahut aahista aahista

sifal-e-KHwab mein maddham

tumhein is pal ijazat hai

kaho! yun KHalwat-e-jaan mein bilorin chuDiyan chhan chhan chhanakti shor karti hain

mera dil Dol jata hai

wufur-e-husn mein lipTi tumhaari ambarin zulfen

dhDakna bhul jata hai

kaho! kajal siyah kajal dhanak rangon ka mela hai

kaho! poren KHayalon ki sunahri jild mein jalte diyon par raqs karti hain

surahi-dar gardan par damakti nuqrai mala tumhaare kan ki baali ye jadugar!

ye ishwa-gar

talab ki be-zabani ko ata karte hain goyai

tumhein is pal ijazat hai

kaho yun bhed ke jaise sarakta raat ka aanchal hawa mein sarsaraata hai

sitara shauq ka meri nazar mein jhilmilata hai

kaho! na mausam-e-gul hai, gulabon ki qataron mein damakte shabnami lamhe

tumhaare lams ke pyase

bahr mauj-e-nafas Thahra sukut-e-shauq ka mausam tumhein aawaz deta hai

tamanna git ki surat labon par gungunati hai

mohabbat be-muhaba ek lamhe ko tarasti hai

tamanna be-KHabar! ghafil

fusun-e-KHwab ki muddat bahut thoDi bahut kam hai