ghaalib aur aam

na the shā.ir hī kuchh baḌe ġhālib

dil-lagī meñ bhī ḳhuub the ġhālib

ḳhuub hañste hañsāte rahte the

baḌī pur-lutf baat kahte the

aam un ko pasand the behad

ya.anī rasiyā the aam ke behad

ḳhud bhī bāzār se mañgāte the

dost bhī aam un ko bhijvāte

phir bhī aamoñ se jī na bhartā thā

aam kā shauq un ko itnā thā

un ke qisse tumheñ sunā.eñ ham

un kī bātoñ se kuchh hañsā.eñ ham

ek mahfil meñ vo bhī baiThe the

log aamoñ kā zikr karte the

aam aisā ho aam vaisā ho

pūchhā ġhālib se aam kaisā ho

bole ġhālib ki pūchhte ho agar

sirf do ḳhūbiyoñ pe rakhiye nazar

baat pahlī ye hai ki mīThā ho

dūsrī baat ye bahut sā ho

ek din dost un ke ghar aa.e

aam ġhālib ne the bahut khaa.e

sāmne ghar ke the paḌe chhilke

us galī meñ se kuchh gadhe guzre

un gadhoñ ne na chhilke vo khaa.e

sūñgh kar un ko baḌh ga.e aage

dost ne jab ye mājrā dekhā

sochā ġhālib ko ab hai samjhānā

dost bole hai shai burī sī aam

dekho khāte nahīñ gad.he bhī aam

hañs ke ġhālib ye dost se bole

jī haañ be-shak gad.he nahīñ khāte

bādshah kar rahe the sair-e-bāġh

ḳhush thā aamoñ se un kā qalb-o-dimāġh

bādshah ke the saath ġhālib bhī

Dālte the nazar vo lalchā.ī

jī meñ ye thā ki ḳhuub khā.eñ aam

bādshah se jo aaj paa.eñ aam

ghūrte the jo ġhālib aamoñ ko

bādshah bole ghūrte kyā ho

bādshah se ye bole vo hañs kar

muhr hotī hai daane daane par

dekhtā huuñ yuuñ ghuur kar maiñ aam

shāyad un par likhā ho merā naam

maqsad un kā jo bādshah paa.e

phir bahut aam un ko bhijvā.e

na the shair hi kuchh baDe ghaalib

dil-lagi mein bhi KHub the ghaalib

KHub hanste hansate rahte the

baDi pur-lutf baat kahte the

aam un ko pasand the behad

yani rasiya the aam ke behad

KHud bhi bazar se mangate the

dost bhi aam un ko bhijwate

phir bhi aamon se ji na bharta tha

aam ka shauq un ko itna tha

un ke qisse tumhein sunaen hum

un ki baaton se kuchh hansaen hum

ek mahfil mein wo bhi baiThe the

log aamon ka zikr karte the

aam aisa ho aam waisa ho

puchha ghaalib se aam kaisa ho

bole ghaalib ki puchhte ho agar

sirf do KHubiyon pe rakhiye nazar

baat pahli ye hai ki miTha ho

dusri baat ye bahut sa ho

ek din dost un ke ghar aae

aam ghaalib ne the bahut khae

samne ghar ke the paDe chhilke

us gali mein se kuchh gadhe guzre

un gadhon ne na chhilke wo khae

sungh kar un ko baDh gae aage

dost ne jab ye majra dekha

socha ghaalib ko ab hai samjhana

dost bole hai shai buri si aam

dekho khate nahin gadhe bhi aam

hans ke ghaalib ye dost se bole

ji han be-shak gadhe nahin khate

baadshah kar rahe the sair-e-bagh

KHush tha aamon se un ka qalb-o-dimagh

baadshah ke the sath ghaalib bhi

Dalte the nazar wo lalchai

ji mein ye tha ki KHub khaen aam

baadshah se jo aaj paen aam

ghurte the jo ghaalib aamon ko

baadshah bole ghurte kya ho

baadshah se ye bole wo hans kar

muhr hoti hai dane dane par

dekhta hun yun ghur kar main aam

shayad un par likha ho mera nam

maqsad un ka jo baadshah pae

phir bahut aam un ko bhijwae