bayān-e-'ġhālib'-e-rañgīñ-navā hai
qalam shā.ir kā sajde meñ jhukā hai
pa.e tāzīm saf-basta haiñ alfāz
dil-e-shā.ir meñ ik tūfāñ bapā hai
aqīdat us se har ahl-e-nazar ko
ki vo fikr-o-nazar kā rahnumā hai
vo ġhālib vo shahanshāh-e-ma.ānī
vo 'ġhālib' jis kī azmat ġhair-fānī
salāsat aur fasāhat allāh allāh
ki dariyā-e-suḳhan māñge ravānī
bahut ustād-e-shah the aur hoñge
magar hogā na koī us kā saanī
zarāfat us kī fitrat kā taqāza
matānat us ke fikr-o-fan kā jauhar
mohabbat ruuh us kī shā.irī kī
kahāñ hoñge bhalā aise suḳhnavar
zamāna kis liye us ko miTātā
vo insāñ thā na thā harf-e-mukarrar
zabāñ us kī zabān-e-zindagī hai
bayāñ us kā bayān-e-āgahī hai
bayan-e-'ghaalib'-e-rangin-nawa hai
qalam shair ka sajde mein jhuka hai
pae tazim saf-basta hain alfaz
dil-e-shair mein ek tufan bapa hai
aqidat us se har ahl-e-nazar ko
ki wo fikr-o-nazar ka rahnuma hai
wo ghaalib wo shahanshah-e-maani
wo 'ghaalib' jis ki azmat ghair-fani
salasat aur fasahat allah allah
ki dariya-e-suKHan mange rawani
bahut ustad-e-shah the aur honge
magar hoga na koi us ka sani
zarafat us ki fitrat ka taqaza
matanat us ke fikr-o-fan ka jauhar
mohabbat ruh us ki shairi ki
kahan honge bhala aise suKHnawar
zamana kis liye us ko miTata
wo insan tha na tha harf-e-mukarrar
zaban us ki zaban-e-zindagi hai
bayan us ka bayan-e-agahi hai
Source:
Raushni Ka Safar (Pg. e-138 p-139)
-
Author:
Rifat Sarosh
-
- Edition: 1974
- Publisher: Idaara-e-Ishat-e-Urdu, Amroha, U. P.
- Year of Publication: 1974
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.