gandhi

tū ai gāñdhī 'ilāj-e-dard-e-insāñ ban ke aayā thā

añdherī raat meñ sub.h-e-daraḳhshāñ ban ke aayā thā

rumūz-e-zindagī ko faash karne qalb-e-ādam par

charāġh-e-āgahī qindīl-e-'irfāñ ban ke aayā thā

rasīlā giit ban kar chhā gayā muflis kī mahfil meñ

jahān-e-zar meñ shor-e-barq-o-bārāñ ban ke aayā thā

safīna nazm-e-shāhī kā Dubo kar dam liyā jis ne

tū vo jamhūriyat kā tund tūfāñ ban ke aayā thā

dil-e-mazlūm ke haq meñ tirī hastī thī ik lorī

sitamgar ke liye ḳhvāb-e-pareshāñ ban ke aayā thā

vatan kyā saarī duniyā jis ke jalvoñ se damak uTThī

tū charḳh-e-hind kā vo māh-e-tābāñ ban ke aayā thā

jahān-e-'ishq meñ tū guuñj uThā sāz-e-vafā ban kar

riyāz-e-ādmiyyat meñ bahārāñ ban ke aayā thā

ġhulāmī kī bhayānak tīrgī ko Das liyā jis ne

tū āzādī kī vo sham'-e-farozāñ ban ke aayā thā

farishtoñ kā taqaddus thā tire kirdār meñ pinhāñ

bazāhir dahr meñ tū ek insāñ ban ke aayā thā

tu ai gandhi 'ilaj-e-dard-e-insan ban ke aaya tha

andheri raat mein subh-e-daraKHshan ban ke aaya tha

rumuz-e-zindagi ko fash karne qalb-e-adam par

charagh-e-agahi qindil-e-'irfan ban ke aaya tha

rasila git ban kar chha gaya muflis ki mahfil mein

jahan-e-zar mein shor-e-barq-o-baran ban ke aaya tha

safina nazm-e-shahi ka Dubo kar dam liya jis ne

tu wo jamhuriyat ka tund tufan ban ke aaya tha

dil-e-mazlum ke haq mein teri hasti thi ek lori

sitamgar ke liye KHwab-e-pareshan ban ke aaya tha

watan kya sari duniya jis ke jalwon se damak uTThi

tu charKH-e-hind ka wo mah-e-taban ban ke aaya tha

jahan-e-'ishq mein tu gunj uTha saz-e-wafa ban kar

riyaz-e-admiyyat mein bahaaran ban ke aaya tha

ghulami ki bhayanak tirgi ko Das liya jis ne

tu aazadi ki wo sham'-e-farozan ban ke aaya tha

farishton ka taqaddus tha tere kirdar mein pinhan

bazahir dahr mein tu ek insan ban ke aaya tha