ghair-marai taqat

koī ġhair-mara.ī sī tāqat to hogī

jilau meñ jo le kar

har ik rūh-e-tifl-o-javāñ ko

ḳhamoshī se sū-e-falak kuuch kartī hai akasr

koī baap ma.asūm beTe ko thāme

davā de rahā hai, har ik saañs ke zer-o-bam par nazar hai

udhar us kī jaañ jism se jā rahī hai

magar kuchh nazar bhī na aa.e, samajh meñ na aa.e

abhī kheltā thaa, abhī dekhtā thā

abhī to, abhī, haañ abhī band āñkheñ huī haiñ

ye dekho laboñ par,

ajab ek ma.asūm sī muskurāhaT hai baaqī

magar koī jumbish nahīñ hai

ramaq zindagī kī na baaqī hai koī

koī ġhair-mara.ī sī tāqat to hogī,

jo āhistagī se chalī aatī hogī

ḳhamoshī se āġhosh meñ apnī,

ma.asūm rūhoñ ko le kar chalī jaatī hogī

yaqīnan koī ġhair-mara.ī sī tāqat hai varna

agar koī mara.ī sī tāqat jo hotī

to nādān insāñ bahut ġhul machātā

magar ye nizām-e-ilāhī badaltā nahīñ hai

koi ghair-marai si taqat to hogi

jilau mein jo le kar

har ek ruh-e-tifl-o-jawan ko

KHamoshi se su-e-falak kuch karti hai akasr

koi bap masum beTe ko thame

dawa de raha hai, har ek sans ke zer-o-bam par nazar hai

udhar us ki jaan jism se ja rahi hai

magar kuchh nazar bhi na aae, samajh mein na aae

abhi khelta tha, abhi dekhta tha

abhi to, abhi, han abhi band aankhen hui hain

ye dekho labon par,

ajab ek masum si muskurahaT hai baqi

magar koi jumbish nahin hai

ramaq zindagi ki na baqi hai koi

koi ghair-marai si taqat to hogi,

jo aahistagi se chali aati hogi

KHamoshi se aaghosh mein apni,

masum ruhon ko le kar chali jati hogi

yaqinan koi ghair-marai si taqat hai warna

agar koi marai si taqat jo hoti

to nadan insan bahut ghul machata

magar ye nizam-e-ilahi badalta nahin hai