gham-e-jamhur

jhukegā ḳhaak pe ye qasr-e-āsmāñ ik din

hamāre zer-e-qadam hogī kahkashāñ ik din

baḌhegā jānib-e-manzil ye kārvāñ ik din

fazā-e-arz-o-samā hogī ham-ināñ ik din

hayāt-e-ḳhizr milegī har ek zarre ko

hamārā naqsh-e-qadam hogā jāvedāñ ik din

abhī jo ḳhirman-e-ahl-e-vafā pe girtī haiñ

charāġh-e-rāh baneñgī vo bijliyāñ ik din

ba-īñ yaqīn o ba-īñ etiqād-e-husn-e-yaqīñ

abhī to aa.egā vo ahd-e-ḳhūñ-chakāñ ik din

vo ahd jis meñ azā.em ke soz-o-sāz ke saath

uThegā sīna-e-mazdūr se dhuāñ ik din

hamāre zauq-e-tajassus kī tishna-kāmī kā

zamāna legā sar-e-dār imtihāñ ik din

mileñge bhes meñ rahzan ke rahbarān-e-vatan

fareb deñge hamāre hī pāsbāñ ik din

ye zar-parast ki haiñ inqilāb ke dushman

miTā ke ham ko bahut hoñge shādmāñ ik din

chaman pe firqa-parastī kī aag barsā kar

ye phūñk deñge har ik shāḳh-e-āshiyāñ ik din

unhīñ kā tiir hai vo 'godse' ho yā 'akbar'

har ek bazm pe lachkegī ye kamāñ ik din

banā.eñge yahī jamhūriyat ke parde meñ

hamāre mulk pe ġhairoñ ko hukmrāñ ik din

manāeñge ye ġharīboñ ke ḳhuun se holī

ujaaḌ deñge kisānoñ kī bastiyāñ ik din

ye jānashīn haiñ rāvan ke in kī sāzish se

uTheñgī raam kī azmat pe uñgliyāñ ik din

jilau meñ in ke vo sailāb-e-kisht-o-ḳhūñ hogā

laraz uTheñgī himāla kī choTiyāñ ik din

butān-e-dair nadāmat se sar-nigūñ hoñge

uThegī sīna-e-nāqūs se fuġhāñ ik din

jhukega KHak pe ye qasr-e-asman ek din

hamare zer-e-qadam hogi kahkashan ek din

baDhega jaanib-e-manzil ye karwan ek din

faza-e-arz-o-sama hogi ham-inan ek din

hayat-e-KHizr milegi har ek zarre ko

hamara naqsh-e-qadam hoga jawedan ek din

abhi jo KHirman-e-ahl-e-wafa pe girti hain

charagh-e-rah banengi wo bijliyan ek din

ba-in yaqin o ba-in etiqad-e-husn-e-yaqin

abhi to aaega wo ahd-e-KHun-chakan ek din

wo ahd jis mein azaem ke soz-o-saz ke sath

uThega sina-e-mazdur se dhuan ek din

hamare zauq-e-tajassus ki tishna-kaami ka

zamana lega sar-e-dar imtihan ek din

milenge bhes mein rahzan ke rahbaran-e-watan

fareb denge hamare hi pasban ek din

ye zar-parast ki hain inqilab ke dushman

miTa ke hum ko bahut honge shadman ek din

chaman pe firqa-parasti ki aag barsa kar

ye phunk denge har ek shaKH-e-ashiyan ek din

unhin ka tir hai wo 'godse' ho ya 'akbar'

har ek bazm pe lachkegi ye kaman ek din

banaenge yahi jamhuriyat ke parde mein

hamare mulk pe ghairon ko hukmran ek din

manaenge ye gharibon ke KHun se holi

ujaD denge kisanon ki bastiyan ek din

ye jaanashin hain rawan ke in ki sazish se

uThengi ram ki azmat pe ungliyan ek din

jilau mein in ke wo sailab-e-kisht-o-KHun hoga

laraz uThengi himala ki choTiyan ek din

butan-e-dair nadamat se sar-nigun honge

uThegi sina-e-naqus se fughan ek din