gandi laDki

gandī laḌkī parī ho yā vo huur

karte haiñ sab log us ko duur duur

muñh lagā kar baat to karte nahīñ

gandī ko pyaar karte haiñ kahīñ

māñjh kar manjan se daañt apne na dho.e

zid kare har baat par har lahza ro.e

reñt apnī āstīn se poch le

baal sar ke aap apne noch le

aaj pahne kal kare mailā libās

us ko aane de koī kyoñ apne paas

aisī laḌkī kī bhalā kyā aabrū

chepaḌ āñkhoñ meñ ho jis ke muñh meñ bū

kañghī bāloñ meñ na sar meñ tel hai

bad-tamīzī rāt-din kā khel hai

dhuup meñ khele na aa.e chhāñv meñ

sar pe Topī hai na juutā paañv meñ

achchhī ḳhāsī apne paḌhne kī kitāb

jā-ba-jā kar de lakīroñ se ḳharāb

raushnā.ī ke haiñ dhabbe jā-ba-jā

kurte kā hai āgā-pīchhā ek sā

khānā khā kar poch le dāman se haath

kapḌe bhar jaa.eñ kabhī sālan se haath

aisī laḌkī ko karegā kaun pyaar

paas jis ke jaa.e us ko aa.e aar

gandi laDki pari ho ya wo hur

karte hain sab log us ko dur dur

munh laga kar baat to karte nahin

gandi ko pyar karte hain kahin

manjh kar manjan se dant apne na dhoe

zid kare har baat par har lahza roe

rent apni aastin se poch le

baal sar ke aap apne noch le

aaj pahne kal kare maila libas

us ko aane de koi kyon apne pas

aisi laDki ki bhala kya aabru

chepaD aankhon mein ho jis ke munh mein bu

kanghi baalon mein na sar mein tel hai

bad-tamizi raat-din ka khel hai

dhup mein khele na aae chhanw mein

sar pe Topi hai na juta panw mein

achchhi KHasi apne paDhne ki kitab

ja-ba-ja kar de lakiron se KHarab

raushnai ke hain dhabbe ja-ba-ja

kurte ka hai aaga-pichha ek sa

khana kha kar poch le daman se hath

kapDe bhar jaen kabhi salan se hath

aisi laDki ko karega kaun pyar

pas jis ke jae us ko aae aar