ganga

ai āb-rūd-e-gañgā uf rī tirī safā.ī

ye terā husn dil-kash ye tarz-o-dil-rubā.ī

terī tajalliyāñ haiñ jalva-farosh ma.anī

tanvīr meñ hai terī ik shān-e-kibriyā.ī

jamunā tirī sahelī go saath kī hai khelī

us meñ magar kahāñ hai terī sī jāñ-fazā.ī

be-laus terā dāman hai dāġh-e-ma.asiyat se

mauzūñ hai tere qad par malbūs-e-pārsā.ī

dil-band ham haiñ tere laḳht-e-jigar haiñ tere

naḳhl-e-murād hai tau aur ham samar haiñ tere

mīnū-savād tujh se haiñ vādiyāñ hamārī

aur kisht-e-ārzū hai rashk-e-jināñ hamārī

vo din bhī hogā hoñge jab ham ġharīq-e-rahmat

aur terī nazr hoñgī ye haDDiyāñ hamārī

gañgā meñ pheñk aanā ba.ad-e-fanā uThā kar

barbād ho na miTTī o āsmāñ hamārī

yārab na dafn kar ke ahbāb bhuul jaa.eñ

le kar hamāre ḳhush ḳhush gañgā ko phuul jaa.eñ

o paak nāznīn o phūloñ ke gahne vaalī

sarsabz vādiyoñ ke dāman meñ bahne vaalī

o nāz-āfrīñ o sidq-o-safā kī devī

o iffat-e-mujassam parbat kī rahne vaalī

salle-alā ye terī maujoñ kā gungunānā

vahdat kā ye tarāna o chup na rahne vaalī

husn-e-ġhayūr terā hai be-niyāz hastī

to bahr-e-ma.arfat hai o pāk-bāz hastī

haañ tujh ko justujū hai kis bahr-e-be-karāñ kī

ham par to kuchh haqīqat khultī nahīñ jahāñ kī

ai parda-soz imkāñ ai jalva-rez irfāñ

to sham-e-anjuman hai kis bazm-e-dil-sitāñ kī

kyuuñ jāda-e-talab meñ phirtī kashāñ kashāñ hai

tujh ko talāsh hai kis gum-gashta kārvāñ kī

jaatī hai tū kahāñ ko aatī hai tū kahāñ se

dil-bastagī hai tujh ko kis bahr-e-be-nishāñ se

aa.ī nazar tajallī jab shāhid azal kī

zarroñ meñ jā ke chamkī phūloñ meñ jā ke jhalkī

hindostān hai ik dariyā-e-husn-e-qudrat

aur us meñ pañkhuḌī hai tū ḳhushnumā kañval kī

niklī himaliya se mahv-e-ḳharosh ho kar

tū aah tishna-lab thī vo jalva-e-azal kī

kartī huī zamīñ par motī nisār aa.ī

darshan ko aah har ke tū haridvār aa.ī

ye josh-e-sabza-e-gul ye terī āb-bārī

qudrat ke chappe chappe par ye shagūfa-kārī

hindostāñ ko tū ne jannat-nishāñ banāyā

nahreñ kahāñ kahāñ haiñ tere karam kī jaarī

ai āb-rūd-e-gañgā maujoñ meñ tere mil kar

mauj-e-sarāb-e-hastī ho be-nishāñ hamārī

ba.ad-e-fanā hamāre phūloñ meñ bū ho terī

gum hoñ rah-e-talab meñ to justujū ho terī

aa.e ajal kī zau par jab apnī umr-e-fānī

aur ḳhatm rafta rafta ho sail-e-zindagānī

duniyā se aah jab ho apnī safar kā sāmāñ

bālīñ pe aqrbāñ hoñ sargarm-e-nauha-ḳhvānī

jab hoñT ḳhushk hoñ aur dushvār ho tanaffus

ahbāb apne muñh meñ Tapkā.eñ terā paanī

hañste hue jahāñ se ham shād-kām jaa.eñ

duniyā se pī ke terī ulfat kā jaam jaa.eñ

ai aab-rud-e-ganga uf ri teri safai

ye tera husn dil-kash ye tarz-o-dil-rubai

teri tajalliyan hain jalwa-farosh mani

tanwir mein hai teri ek shan-e-kibriyai

jamuna teri saheli go sath ki hai kheli

us mein magar kahan hai teri si jaan-fazai

be-laus tera daman hai dagh-e-masiyat se

mauzun hai tere qad par malbus-e-parsai

dil-band hum hain tere laKHt-e-jigar hain tere

naKHl-e-murad hai tau aur hum samar hain tere

minu-sawad tujh se hain wadiyan hamari

aur kisht-e-arzu hai rashk-e-jinan hamari

wo din bhi hoga honge jab hum ghariq-e-rahmat

aur teri nazr hongi ye haDDiyan hamari

ganga mein phenk aana baad-e-fana uTha kar

barbaad ho na miTTi o aasman hamari

yarab na dafn kar ke ahbab bhul jaen

le kar hamare KHush KHush ganga ko phul jaen

o pak naznin o phulon ke gahne wali

sarsabz wadiyon ke daman mein bahne wali

o naz-afrin o sidq-o-safa ki dewi

o iffat-e-mujassam parbat ki rahne wali

salle-ala ye teri maujon ka gungunana

wahdat ka ye tarana o chup na rahne wali

husn-e-ghayur tera hai be-niyaz hasti

to bahr-e-marfat hai o pak-baz hasti

han tujh ko justuju hai kis bahr-e-be-karan ki

hum par to kuchh haqiqat khulti nahin jahan ki

ai parda-soz imkan ai jalwa-rez irfan

to sham-e-anjuman hai kis bazm-e-dil-sitan ki

kyun jada-e-talab mein phirti kashan kashan hai

tujh ko talash hai kis gum-gashta karwan ki

jati hai tu kahan ko aati hai tu kahan se

dil-bastagi hai tujh ko kis bahr-e-be-nishan se

aai nazar tajalli jab shahid azal ki

zarron mein ja ke chamki phulon mein ja ke jhalki

hindostan hai ek dariya-e-husn-e-qudrat

aur us mein pankhuDi hai tu KHushnuma kanwal ki

nikli himaliya se mahw-e-KHarosh ho kar

tu aah tishna-lab thi wo jalwa-e-azal ki

karti hui zamin par moti nisar aai

darshan ko aah har ke tu haridwar aai

ye josh-e-sabza-e-gul ye teri aab-bari

qudrat ke chappe chappe par ye shagufa-kari

hindostan ko tu ne jannat-nishan banaya

nahren kahan kahan hain tere karam ki jari

ai aab-rud-e-ganga maujon mein tere mil kar

mauj-e-sarab-e-hasti ho be-nishan hamari

baad-e-fana hamare phulon mein bu ho teri

gum hon rah-e-talab mein to justuju ho teri

aae ajal ki zau par jab apni umr-e-fani

aur KHatm rafta rafta ho sail-e-zindagani

duniya se aah jab ho apni safar ka saman

baalin pe aqrban hon sargarm-e-nauha-KHwani

jab honT KHushk hon aur dushwar ho tanaffus

ahbab apne munh mein Tapkaen tera pani

hanste hue jahan se hum shad-kaam jaen

duniya se pi ke teri ulfat ka jam jaen