gar TuT gae to haar gae

jab mere vatan kī galiyoñ meñ

zulmat ne pañkh pasāre the

aur raat ke kaale bādal ne

har shahr meñ Derā Daalā thā

jab bastī bastī dahak uThī

yuuñ lagtā thā sab raakh huā

yuuñ lagtā thā mahshar hai bapā

aur raat ke zālim saa.e se

bachne kā koī yaarā bhī na thā

sadiyoñ meñ tarāshā thā jis ko

insān ke anthak hāthoñ ne

tahzīb ke is gahvāre meñ

har phuul dahaktā sho.ala thā

jab naam ḳhud īñdhan kī tarah

bhaTTī meñ jalāyā jaane lagā

aur nek ḳhudā ke sab bande

mardūd-e-haram Thahrā.e ga.e

jab ḳhuun kī holī rasm banī

aur maqtal-gāheñ aam huiiñ

barbariyat vahshat fan Thahrī

is fan kī bazmeñ aam huiiñ

jab shauhar beTe bhaa.ī pidar

sab nām-e-ḳhudā ke kaam aa.e

āvāz thī ik insān kī bhī

is shor ke bīhaḌ jangal meñ

jo miTne ko tayyār na thī

jo zehnoñ ko garmāti rahī

jo chhalnī jism se kahtī rahī

uTh haath baḌhā hāthoñ ko pakaḌ

lākhoñ haiñ yahāñ tere jaise

is jang ko jaarī rakhnā hai

gar TuuT ga.e to haar ga.e

jab mere watan ki galiyon mein

zulmat ne pankh pasare the

aur raat ke kale baadal ne

har shahr mein Dera Dala tha

jab basti basti dahak uThi

yun lagta tha sab rakh hua

yun lagta tha mahshar hai bapa

aur raat ke zalim sae se

bachne ka koi yara bhi na tha

sadiyon mein tarasha tha jis ko

insan ke anthak hathon ne

tahzib ke is gahware mein

har phul dahakta shoala tha

jab nam KHud indhan ki tarah

bhaTTi mein jalaya jaane laga

aur nek KHuda ke sab bande

mardud-e-haram Thahrae gae

jab KHun ki holi rasm bani

aur maqtal-gahen aam huin

barbariyat wahshat fan Thahri

is fan ki bazmen aam huin

jab shauhar beTe bhai pidar

sab nam-e-KHuda ke kaam aae

aawaz thi ek insan ki bhi

is shor ke bihaD jangal mein

jo miTne ko tayyar na thi

jo zehnon ko garmati rahi

jo chhalni jism se kahti rahi

uTh hath baDha hathon ko pakaD

lakhon hain yahan tere jaise

is jang ko jari rakhna hai

gar TuT gae to haar gae