ghas mein chhupe sanp

maiñ ghaas huuñ

harī-bharī ghaas

paanī mile to harī-bharī na mile to ghās-phūs

thoḌī nargisiyat kī ijāzat dījiye

are jab ugtī huuñ to kyā joban hotā hai mujh par

na.ī na.ī ghaas par sūraj kī kirneñ paḌtī haiñ to

andhoñ kī āñkhoñ meñ bhī tarāvat utar aatī hai janāb

aur haa.e vo taaza taaza ghaas kī ḳhushbū

par afsos jab der tak bārish na ho to piilī paḌ jaatī huuñ

magar dhuup pahle mujhe sonā aur phir kundan banā detī hai

zamīn par īstāda hazāroñ pahāḌiyoñ par merā hī rañg chaḌhā hotā hai

aañkh rakhne vaale kahte haiñ

sabze se Dhakī pahāḌiyāñ kitnī bhī hasīn hoñ

sone se Dhakī pahāḌiyoñ kī baat hī alag hai

lekin ye maiñ kyā baḌ hāñkne baiTh ga.ī

āmdan barsar-e-matlab maiñ sāñpoñ ke baare meñ kuchh kahnā chāhtī huuñ

saañp jo ghaas meñ chhup kirdār karte haiñ

ghaas se Dhake lawn baaġh aur park

karoḌoñ insānoñ ko taskīn dete haiñ

bachche ghaas par bhāgte dauḌte uchhalte kūdte aur loT-poT hote haiñ

javān mujh par chalte hue mohabbatoñ kā iz.hār aur iqrār karte haiñ

umr-rasīda log duur duur tak phaile sabze ko dekh kar

dil kī ghuTan aur ehsās-e-ziyāñ bhuul jaate haiñ

maiñ ḳhush hotī huuñ ki kisī ke kaam aa hī huuñ

lekin merī ḳhushī dukh aur sharmindagī meñ badal jaatī hai

jab mere andar chhupe hue saañp insānoñ ko Das lete haiñ

sochtī huuñ in sāñpoñ kā kyā ilaaj karūñ

sochtī huuñ in sāñpoñ kā koī ilaaj hai bhī yā nahīñ

sochtī huuñ saañp mujhī meñ to nahīñ chhupe

vo to zamīn ke kone kone meñ maujūd haiñ

us ke andar bhī us ke bāhar bhī

sochtī huuñ jis tezī se sāñpoñ kī ta.adād baḌh rahī hai

kal ye saarī zamīn par na chhā jaa.eñ

sochtī huuñ koī sailāb hī aa jaa.e jo unheñ bahā le jaa.e

phir ḳhayāl aatā hai ye bah kar jā.eñge kahāñ

āḳhir ek na ek din paanī utregā aur ye dobāra ḳhushkī par chaḌh ā.eñge

aur mere hī dāman meñ panāh le leñge

sochtī huuñ ḳhudā ne mujhe banāyā thā to unheñ kyuuñ banāyā

aur agar banāyā hī thā to un ke andar zahar kyuuñ bhar diyā

kyuuñ ho ga.e ye insān ke dushman

magar saare saañp to zahrīle nahīñ hote

aur kyā insānoñ ke andar bhī zahr nahīñ bhartā jā rahā hai ab

sochtī huuñ insān saañp se Dartā hai to

saañp bhī insān se Dartā hai

insān ne saañp meñ shaitān kī shakl dekhī thī

jis ne use jannat se nikalvā diyā thā

insān ke andar shaitān se barābar utarne kī talab rakh dī ga.ī hai

jahāñ kahīñ saañp ko dekhtā hai use mārne kī koshish kartā hai

saañp ko bhī insān ke us azlī-o-abdī irāde kī ḳhabar hai

isī liye to insān kī aahaT yā bū paate hī bhaag khaḌā hotā hai

ḳharābī to merī vaj.h se hotī hai

ghaas meñ chhupā saañp insān ko dekh kar bhāgtā hai

lekin insān use dekh nahīñ paatā aur nā-dānista us kā paañv saañp par paḌ jaatā hai

aur saañp apnī jaan bachāne ke liye use Das letā hai

yuuñ maiñ zarīya ban jaatī huuñ insān kī maut kā

mujhe apnā ye kirdār hargiz pasand nahīñ

sochtī huuñ insānoñ aur sāñpoñ ne aapas meñ laḌnā hī hai to

merī aaḌ meñ na laḌeñ

saḌkoñ par laḌeñ gharoñ ke andar laḌeñ

chaTyal maidānoñ meñ laḌeñ sahrāoñ meñ laḌeñ

phir ḳhayāl aatā hai in jag.hoñ par to pahle hī ghamsān kī laḌā.ī ho rahī hai

insān insān se laḌ rahā hai

aur us ne tarah tarah ke

mohlik kīmiyā.ī jauharī aur nafsiyātī hathiyār ījād kar liye haiñ

ek dūsre ko dukh dene aur mārne ke liye

sochtī huuñ kahīñ insānoñ ne marne kā shauq to nahīñ paal liyā

aur agar unhoñ ne marne hī kī Thaan lī hai

to maiñ kis chakkar meñ un kā ġham khā rahī huuñ

mujhe yahī fikr hai nā ki zindagī arboñ saal ke safar meñ insān tak pahuñchī hai

aur ab agar insānoñ ke hāthoñ insān tabāh ho ga.e

aur saath hī zamīn barbād ho ga.ī to meñ bhī maarī jā.ūñgī

zindagī hī ruḳhsat ho jā.egī zamīn se

phir ḳhayāl aatā hai maiñ to zindagī kī bahut ibtidā.ī sūrat huuñ

agar zindagī kā safar khoTā ho jaane kī is qadar fikr lāhiq hai mujhe

to insān jo zindagī kā afzal-tarīn namūna haiñ

vo ijtimā.ī ḳhud-kushī ke rāste par kyuuñ chal nikle haiñ

sāñpoñ se dushmanī nibāhte nibāhte ḳhud saañp kyuuñ ban ga.e haiñ

ḳhūb-sūrat aur be-zarar saañp nahīñ

zahrīle aur mohlik saañp jo ek dūsre ko Das rahe haiñ

aur kuchh insān to daulat aur tāqat sameT kar azhdahe ban ga.e haiñ

afsos to ye hai ki maare ziyāda-tar vo jā rahe haiñ jin kā koī qusūr nahīñ hotā

azdahoñ kī laḌā.ī meñ chhoTe-moTe saañp

makkhiyoñ aur chiyūñTiyoñ kī tarah pis kar rah jaate haiñ

sochtī huuñ kisī sailāb ne zamīn ko sāñpoñ se paak bhī kar diyā

to sāñpoñ kī tarah phaTkārte insānoñ se kyūñkar chhuTkārā hogā

isī liye soch soch kar chup ho rahtī huuñ

lekin ye chup andar hī andar mujhe khaa.e jaatī hai

dekhiye meñ piilī paḌtī jā rahī huuñ

hare-bhare sabze se rūkhā-sūkhā ghās-phūs bantī jā rahī huuñ

aur zamīn par sonā bikhartā jā rahā hai

pahāḌiyāñ sone se damak uThī haiñ

magar insān un se be-niyāz

kāġhzī sone kī talāsh meñ

ek dūsre kā galā kāTte hue

zamīn par maare maare phir rahe haiñ

kaash insān kāġhzī sone se nigāh uThā kar dekhte

ki jis saañp ko vo shaitān samajh kar mārne dauḌte haiñ

vo to hirs kī sūrat meñ us ke dil meñ jā baiThā hai

aur un ke apne hāthoñ kāġhaz ke chand TukḌoñ kī ḳhātir

nasl-e-insānī ko halāk karvā rahā hai

sochtī huuñ aag ugalte sāñpoñ kī tarah

kisī insān kī phunkār ne mujhe chiñgārī dikhā dī

to jañgal ke jañgal jal kar raakh ho jā.eñge

insān ko to apnī nau kī fikr nahīñ

vo zamīn par ābād zindagī kī dūsrī sūratoñ kī kyā parvā karegā

kaash use fursat hotī dekhne kī

ki jis ghās-phūs ko vo be-dhyānī meñ jilā Dāltā hai

vo zamīn kā libās hai

is zamīn kā jis ne use paalā thā

jo saarī zindagī kī tarah us kī bhī maañ hai

aur ghās-phūs ko jalā kar vo apnī maañ ko be-satr kar rahā hai

lekin maiñ ye kyā pakhān le baiThī huuñ

maiñ to apnā ta.āruf karā rahī thī

aur apne andar chhupe sāñpoñ kī baat kar rahī thī

aur chal paḌī sāñpoñ se insān kī taraf

insānoñ kī taraf jo sāñpoñ kī taraf chal rahe haiñ

vaise saañp bhī apne bachche khā jaatā hai

aur ab insān bhī apne bachche khā rahā hai

aur maiñ vahī ghaas

mahv-e-yās udaas

main ghas hun

hari-bhari ghas

pani mile to hari-bhari na mile to ghas-phus

thoDi nargisiyat ki ijazat dijiye

are jab ugti hun to kya joban hota hai mujh par

nai nai ghas par suraj ki kirnen paDti hain to

andhon ki aankhon mein bhi tarawat utar aati hai janab

aur hae wo taza taza ghas ki KHushbu

par afsos jab der tak barish na ho to pili paD jati hun

magar dhup pahle mujhe sona aur phir kundan bana deti hai

zamin par istada hazaron pahaDiyon par mera hi rang chaDha hota hai

aankh rakhne wale kahte hain

sabze se Dhaki pahaDiyan kitni bhi hasin hon

sone se Dhaki pahaDiyon ki baat hi alag hai

lekin ye main kya baD hankne baiTh gai

aamdan barsar-e-matlab main sanpon ke bare mein kuchh kahna chahti hun

sanp jo ghas mein chhup kirdar karte hain

ghas se Dhake lawn bagh aur park

karoDon insanon ko taskin dete hain

bachche ghas par bhagte dauDte uchhalte kudte aur loT-poT hote hain

jawan mujh par chalte hue mohabbaton ka izhaar aur iqrar karte hain

umr-rasida log dur dur tak phaile sabze ko dekh kar

dil ki ghuTan aur ehsas-e-ziyan bhul jate hain

main KHush hoti hun ki kisi ke kaam aa hi hun

lekin meri KHushi dukh aur sharmindagi mein badal jati hai

jab mere andar chhupe hue sanp insanon ko Das lete hain

sochti hun in sanpon ka kya ilaj karun

sochti hun in sanpon ka koi ilaj hai bhi ya nahin

sochti hun sanp mujhi mein to nahin chhupe

wo to zamin ke kone kone mein maujud hain

us ke andar bhi us ke bahar bhi

sochti hun jis tezi se sanpon ki tadad baDh rahi hai

kal ye sari zamin par na chha jaen

sochti hun koi sailab hi aa jae jo unhen baha le jae

phir KHayal aata hai ye bah kar jaenge kahan

aaKHir ek na ek din pani utrega aur ye dobara KHushki par chaDh aaenge

aur mere hi daman mein panah le lenge

sochti hun KHuda ne mujhe banaya tha to unhen kyun banaya

aur agar banaya hi tha to un ke andar zahar kyun bhar diya

kyun ho gae ye insan ke dushman

magar sare sanp to zahrile nahin hote

aur kya insanon ke andar bhi zahr nahin bharta ja raha hai ab

sochti hun insan sanp se Darta hai to

sanp bhi insan se Darta hai

insan ne sanp mein shaitan ki shakl dekhi thi

jis ne use jannat se nikalwa diya tha

insan ke andar shaitan se barabar utarne ki talab rakh di gai hai

jahan kahin sanp ko dekhta hai use marne ki koshish karta hai

sanp ko bhi insan ke us azli-o-abdi irade ki KHabar hai

isi liye to insan ki aahaT ya bu pate hi bhag khaDa hota hai

KHarabi to meri wajh se hoti hai

ghas mein chhupa sanp insan ko dekh kar bhagta hai

lekin insan use dekh nahin pata aur na-danista us ka panw sanp par paD jata hai

aur sanp apni jaan bachane ke liye use Das leta hai

yun main zariya ban jati hun insan ki maut ka

mujhe apna ye kirdar hargiz pasand nahin

sochti hun insanon aur sanpon ne aapas mein laDna hi hai to

meri aaD mein na laDen

saDkon par laDen gharon ke andar laDen

chaTyal maidanon mein laDen sahraon mein laDen

phir KHayal aata hai in jaghon par to pahle hi ghamsan ki laDai ho rahi hai

insan insan se laD raha hai

aur us ne tarah tarah ke

mohlik kimiyai jauhari aur nafsiyati hathiyar ijad kar liye hain

ek dusre ko dukh dene aur marne ke liye

sochti hun kahin insanon ne marne ka shauq to nahin pal liya

aur agar unhon ne marne hi ki Than li hai

to main kis chakkar mein un ka gham kha rahi hun

mujhe yahi fikr hai na ki zindagi arbon sal ke safar mein insan tak pahunchi hai

aur ab agar insanon ke hathon insan tabah ho gae

aur sath hi zamin barbaad ho gai to mein bhi mari jaungi

zindagi hi ruKHsat ho jaegi zamin se

phir KHayal aata hai main to zindagi ki bahut ibtidai surat hun

agar zindagi ka safar khoTa ho jaane ki is qadar fikr lahiq hai mujhe

to insan jo zindagi ka afzal-tarin namuna hain

wo ijtimai KHud-kushi ke raste par kyun chal nikle hain

sanpon se dushmani nibahte nibahte KHud sanp kyun ban gae hain

KHub-surat aur be-zarar sanp nahin

zahrile aur mohlik sanp jo ek dusre ko Das rahe hain

aur kuchh insan to daulat aur taqat sameT kar azhdahe ban gae hain

afsos to ye hai ki mare ziyaada-tar wo ja rahe hain jin ka koi qusur nahin hota

azdahon ki laDai mein chhoTe-moTe sanp

makkhiyon aur chiyunTiyon ki tarah pis kar rah jate hain

sochti hun kisi sailab ne zamin ko sanpon se pak bhi kar diya

to sanpon ki tarah phaTkarte insanon se kyunkar chhuTkara hoga

isi liye soch soch kar chup ho rahti hun

lekin ye chup andar hi andar mujhe khae jati hai

dekhiye mein pili paDti ja rahi hun

hare-bhare sabze se rukha-sukha ghas-phus banti ja rahi hun

aur zamin par sona bikharta ja raha hai

pahaDiyan sone se damak uThi hain

magar insan un se be-niyaz

kaghzi sone ki talash mein

ek dusre ka gala kaTte hue

zamin par mare mare phir rahe hain

kash insan kaghzi sone se nigah uTha kar dekhte

ki jis sanp ko wo shaitan samajh kar marne dauDte hain

wo to hirs ki surat mein us ke dil mein ja baiTha hai

aur un ke apne hathon kaghaz ke chand TukDon ki KHatir

nasl-e-insani ko halak karwa raha hai

sochti hun aag ugalte sanpon ki tarah

kisi insan ki phunkar ne mujhe chingari dikha di

to jangal ke jangal jal kar rakh ho jaenge

insan ko to apni nau ki fikr nahin

wo zamin par aabaad zindagi ki dusri suraton ki kya parwa karega

kash use fursat hoti dekhne ki

ki jis ghas-phus ko wo be-dhyani mein jila Dalta hai

wo zamin ka libas hai

is zamin ka jis ne use pala tha

jo sari zindagi ki tarah us ki bhi man hai

aur ghas-phus ko jala kar wo apni man ko be-satr kar raha hai

lekin main ye kya pakhan le baiThi hun

main to apna taaruf kara rahi thi

aur apne andar chhupe sanpon ki baat kar rahi thi

aur chal paDi sanpon se insan ki taraf

insanon ki taraf jo sanpon ki taraf chal rahe hain

waise sanp bhi apne bachche kha jata hai

aur ab insan bhi apne bachche kha raha hai

aur main wahi ghas

mahw-e-yas udas