gidh

liye haath meñ ek chhoTā speaker

janāb musharraf ye farmā rahe the

mire bhā.iyo aur mere buzurgo

mujhe ilm hai ki tabāhī machā.ī baḌī zalzale ne

masā.ib tumhāre sabhī jāntā huuñ

tumhāre dukhoñ pe merī raat kī niiñd uḌ ga.ī hai

janāb musharraf ḳhitābat ke jauhar dikhā hī rahe the

ki majma.a se ik shaḳhs uThā

muḳhātab kiyā us ne aalī qadr ko

hamārī madad ko haiñ jitne bhī añgrez aa.e

ḳhudā kī qasam vo farishtoñ se kamtar nahīñ haiñ

sipāhī bhī jitne haiñ paak army ke

haiñ vo bhī ḳhulūs-o-mohabbat ke paikar

magar janāb-e-mohtaram ye haqīqat hai sun leñ

ba-zāhir razākār haiñ jo civil ke

sabhī to nahīñ par haiñ aksar luTere

ye bheḌoñ ke malbūs meñ bheḌiye haiñ

hamārī ġharībī ko pahchān kar ye

yahāñ ke maveshī baḌe saste dāmoñ

liye jā rahe haiñ

kudāleñ chalāte haiñ malbe ke andar

ki paa.eñ koī qīmtī shai

kisī nau-biyāhatā dulhan kā zevar

kisī baap kī umr-bhar kī kamā.ī

ye sach hai nahīñ DhūñDte ye

hamāre pyāre azīzoñ kī lāsheñ

faqat DhūñDte haiñ

ye matlab kī chīzeñ

ḳhudā ke liye ham ko in se bachā.eñ

ye gidh haiñ mabādā hameñ noch khā.eñ

janāb musharraf ne biptā sunī to

kaḌak kar ye bole

agar aadmī aisā manhūs pakḌo

to fauran use tum vahīñ Dher kar do

ijāzat hai tum ko ye merī taraf se

mile gar kahīñ dushman-e-qaum aisā

to us ko usī dam jahannum kā rasta dikhāo

janāb-e-musharraf kā farmān sun kar

jo majma.a se uTThā thā mard-e-qalandar

ḳhajil ho ke bolā sadā-e-ḳhafī se

agar ham meñ hotī itnī hī himmat

to ham aap se aise fariyād karte

liye hath mein ek chhoTa speaker

janab musharraf ye farma rahe the

mere bhaiyo aur mere buzurgo

mujhe ilm hai ki tabahi machai baDi zalzale ne

masaib tumhaare sabhi jaanta hun

tumhaare dukhon pe meri raat ki nind uD gai hai

janab musharraf KHitabat ke jauhar dikha hi rahe the

ki majma se ek shaKHs uTha

muKHatab kiya us ne aali qadr ko

hamari madad ko hain jitne bhi angrez aae

KHuda ki qasam wo farishton se kamtar nahin hain

sipahi bhi jitne hain pak army ke

hain wo bhi KHulus-o-mohabbat ke paikar

magar janab-e-mohtaram ye haqiqat hai sun len

ba-zahir razakar hain jo ciwil ke

sabhi to nahin par hain aksar luTere

ye bheDon ke malbus mein bheDiye hain

hamari gharibi ko pahchan kar ye

yahan ke maweshi baDe saste damon

liye ja rahe hain

kudalen chalate hain malbe ke andar

ki paen koi qimti shai

kisi nau-biyahata dulhan ka zewar

kisi bap ki umr-bhar ki kamai

ye sach hai nahin DhunDte ye

hamare pyare azizon ki lashen

faqat DhunDte hain

ye matlab ki chizen

KHuda ke liye hum ko in se bachaen

ye gidh hain mabaada hamein noch khaen

janab musharraf ne bipta suni to

kaDak kar ye bole

agar aadmi aisa manhus pakDo

to fauran use tum wahin Dher kar do

ijazat hai tum ko ye meri taraf se

mile gar kahin dushman-e-qaum aisa

to us ko usi dam jahannum ka rasta dikhao

janab-e-musharraf ka farman sun kar

jo majma se uTTha tha mard-e-qalandar

KHajil ho ke bola sada-e-KHafi se

agar hum mein hoti itni hi himmat

to hum aap se aise fariyaad karte