gili-sili

maiñ ne

apne mutāle kī Table se

apnī saarī nazmeñ uThā kar

kapḌoñ kī almārī meñ rakh diiñ

taaki

na maiñ nazmoñ ko dekhūñ

na vo mujhe āñkheñ dikhā.eñ

magar jab bhī

maiñ almārī kā paT kholtī

darzoñ se jhāñktī nazmeñ

rotī chīḳhtī aur maiñ

jaldī se almārī band kar detī

aaj bahut dinoñ baad

maiñ ne

jab almārī kholī to

ghup ḳhāmoshī mujhe Takkar Takkar dekhne lagī

maiñ ne Dare sahme

jūñhī locker kholā to

gīlī-sīlī nazmeñ

merī DabDabātī āñkhoñ meñ

aan baiThī haiñ

hamesha hamesha ke liye

main ne

apne mutale ki Table se

apni sari nazmen uTha kar

kapDon ki almari mein rakh din

taki

na main nazmon ko dekhun

na wo mujhe aankhen dikhaen

magar jab bhi

main almari ka paT kholti

darzon se jhankti nazmen

roti chiKHti aur main

jaldi se almari band kar deti

aaj bahut dinon baad

main ne

jab almari kholi to

ghup KHamoshi mujhe Takkar Takkar dekhne lagi

main ne Dare sahme

junhi locker khola to

gili-sili nazmen

meri DabDabaati aankhon mein

aan baiThi hain

hamesha hamesha ke liye