girya-e-sagan

jab kutte raat ko rote haiñ

to aksar log samajhte haiñ

kuchh aisā hone vaalā hai

jo ham ne ab tak sochā thā na hī samjhā thā

jo honā thā vo kab kā lekin ho bhī chukā

ye shahr jalā

is shahr meñ raushan hañste baste ghar the ka.ī

sab raakh hue

aur un ke makīñ

kuchh qatl hue

kuchh jaan bachā kar bhaag ga.e

jo bā-ismat thiiñ

rusvā.ī kī ḳhaak oḌh ke rāhguzar par baiThī haiñ

kuchh beva haiñ

kuchh pā-basta rishtoñ kī vahshat sahtī haiñ

kuchh adh-nañge bhūke bachche

din bhar āvāra phirte haiñ

har jānib mujrim hī mujrim

un meñ se kuchh haiñ pesha-var

kuchh siikh rahe haiñ jurm ke fan ke raaz na.e asrār na.e

jo honā thā ye sach hai us meñ se to bahut kuchh ho bhī chukā

lekin shāyad kuchh aur bhī hone vaalā hai

kutte to āḳhir kutte haiñ

din bhar kachre ke Dheroñ par

vo maare maare phirte haiñ

jab raat utarne lagtī haiñ

aane vaale dushman-mausam kī dahshat se

sab mil kar rone lagte haiñ

jab kutte raat ko rote hain

to aksar log samajhte hain

kuchh aisa hone wala hai

jo hum ne ab tak socha tha na hi samjha tha

jo hona tha wo kab ka lekin ho bhi chuka

ye shahr jala

is shahr mein raushan hanste baste ghar the kai

sab rakh hue

aur un ke makin

kuchh qatl hue

kuchh jaan bacha kar bhag gae

jo ba-ismat thin

ruswai ki KHak oDh ke rahguzar par baiThi hain

kuchh bewa hain

kuchh pa-basta rishton ki wahshat sahti hain

kuchh adh-nange bhuke bachche

din bhar aawara phirte hain

har jaanib mujrim hi mujrim

un mein se kuchh hain pesha-war

kuchh sikh rahe hain jurm ke fan ke raaz nae asrar nae

jo hona tha ye sach hai us mein se to bahut kuchh ho bhi chuka

lekin shayad kuchh aur bhi hone wala hai

kutte to aaKHir kutte hain

din bhar kachre ke Dheron par

wo mare mare phirte hain

jab raat utarne lagti hain

aane wale dushman-mausam ki dahshat se

sab mil kar rone lagte hain