goshwara

ek nazm

vaqt kī jeb kaaTī ga.ī aur churā.ī huī sā.ateñ

zindagānī ke nīlām-ghar meñ mohabbat kī utran kā bhaav

chukāne meñ ḳharchī ga.iiñ

ham ne fursat kā sonā luTā kar

vo rishte ḳharīde

jinheñ ghar ke sandūqche kā

tahaffuz mayassar nahīñ aa sakā

kab talak aise rishte girah meñ liye ghūmnā

be-ḳhayālī meñ tabdīl hote hue pairahan meñ

kisī din ye sāmān rah jā.egā

dil ke kone meñ matrūk chīzoñ ke

bikhre hue Dher par

cigaretoñ se udhārā dhuāñ khīñch kar

be-nishānī kī chādar chaḌhāne ko jitnā samay chāhiye

vo hathelī kī uljhī lakīroñ se laḌne meñ lag jā.egā

in ḳhayāloñ kī lā-yāniyat

surḳh āñkhoñ meñ ghulte hue be-vaj.h rat-jagoñ

phephaḌoñ meñ utarte hue zahr meñ dafn hai

jaise gaañv se aaya huā ik musāfir

baḌe shahr meñ

oh baḌe shahr se yaad aaya

savā tiin bajne ko haiñ in churā.ī huī sā.atoñ se agar kuchh bachā hai use poTlī meñ rakho

apne lafzoñ kā ḳhvāncha uThāo sadā.eñ lagāo

chalo kaam kā vaqt hai

ek nazm

waqt ki jeb kaTi gai aur churai hui saaten

zindagani ke nilam-ghar mein mohabbat ki utran ka bhaw

chukane mein KHarchi gain

hum ne fursat ka sona luTa kar

wo rishte KHaride

jinhen ghar ke sanduqche ka

tahaffuz mayassar nahin aa saka

kab talak aise rishte girah mein liye ghumna

be-KHayali mein tabdil hote hue pairahan mein

kisi din ye saman rah jaega

dil ke kone mein matruk chizon ke

bikhre hue Dher par

cigareton se udhaara dhuan khinch kar

be-nishani ki chadar chaDhane ko jitna samay chahiye

wo hatheli ki uljhi lakiron se laDne mein lag jaega

in KHayalon ki la-yaniyat

surKH aankhon mein ghulte hue be-wajh rat-jagon

phephaDon mein utarte hue zahr mein dafn hai

jaise ganw se aaya hua ek musafir

baDe shahr mein

oh baDe shahr se yaad aaya

sawa tin bajne ko hain in churai hui saaton se agar kuchh bacha hai use poTli mein rakho

apne lafzon ka KHwancha uThao sadaen lagao

chalo kaam ka waqt hai