gul ba-nok-e-Khaar

mirī zulfeñ nahīñ kaalī ghaTā haiñ

mirī peshānī hai mahtāb jaisī

mirī āñkheñ kañval kī pañkhuḌī haiñ

mire lab haiñ gulāboñ se mushābah

mire gāloñ meñ hai laalī shafaq kī

mirī gardan surāhī-dār dekho

mirī bāheñ haiñ misl-e-shāḳh-e-sandal

badan merā hai lāla-zār dekho

adāoñ meñ mirī jādūgarī hai

mirī hastī mukammal shā.irī hai

havas ke maaro meñ bāzār meñ huuñ

gul-e-tar huuñ pa nok-e-ḳhār meñ huuñ

mire husn-o-javānī ke munāsib

lagāv daam aur mujh ko ḳharīdo

ki har sūrat adā karnā hai mujh ko

kisī biivī kī lāchārī kā qarza

kisī shauhar kī bīmārī kā qarza

meri zulfen nahin kali ghaTa hain

meri peshani hai mahtab jaisi

meri aankhen kanwal ki pankhuDi hain

mere lab hain gulabon se mushabah

mere galon mein hai lali shafaq ki

meri gardan surahi-dar dekho

meri bahen hain misl-e-shaKH-e-sandal

badan mera hai lala-zar dekho

adaon mein meri jadugari hai

meri hasti mukammal shairi hai

hawas ke maro mein bazar mein hun

gul-e-tar hun pa nok-e-KHar mein hun

mere husn-o-jawani ke munasib

lagaw dam aur mujh ko KHarido

ki har surat ada karna hai mujh ko

kisi biwi ki lachaari ka qarza

kisi shauhar ki bimari ka qarza