gul-dan

sāl-hā-sāl bayābān-e-gumāñ ko sīñchā

ḳhūn-e-idrāk se āb-e-jāñ se

tab kahīñ us meñ huvaidā hue afkār ke phuul

phuul jin ko mire beTe tirī farhat ke liye

shīsha-e-rūh ke gul-dāñ meñ sajā laayā huuñ

aur chupke se ye gul-dāñ maiñ ne

rakh diyā hai tirī paḌhne kī na.ī mez pe yuuñ

jaise is mez kī takmīl thī us kī muhtāj

aur samajhtā huuñ ki in phūloñ kī nādīda hasīñ ḳhushbū se

tere kamre kī har ik chiiz mahak uTThī hai

kaun jaane ki mirī soch mire zo.am kī gul-kārī ho

fikr kī sho.abada-bāzī ho tasavvur kī talabgārī ho

aur tū siiTī bajātā huā kamre meñ ho dāḳhil to tujhe

ajnabī baas kā karb

yak-ba-yak saañs ke rukne kī aziyyat se ham-āġhosh kare

aur jhuñjhlā ke tū gul-dāñ ko darīche se pare

pheñk de jāda-e-sañgīñ kī taraf

pas-e-dīvār khaḌā

maiñ sunūñ TūTte gul-dāñ kī sadā

aur mire kāñpte hoñToñ se uThe

tere ehsās kī barnā.ī ke be-Tok panapne kī duā

sal-ha-sal bayaban-e-guman ko sincha

KHun-e-idrak se aab-e-jaan se

tab kahin us mein huwaida hue afkar ke phul

phul jin ko mere beTe teri farhat ke liye

shisha-e-ruh ke gul-dan mein saja laya hun

aur chupke se ye gul-dan main ne

rakh diya hai teri paDhne ki nai mez pe yun

jaise is mez ki takmil thi us ki muhtaj

aur samajhta hun ki in phulon ki nadida hasin KHushbu se

tere kamre ki har ek chiz mahak uTThi hai

kaun jaane ki meri soch mere zoam ki gul-kari ho

fikr ki shoabada-bazi ho tasawwur ki talabgari ho

aur tu siTi bajata hua kamre mein ho daKHil to tujhe

ajnabi bas ka karb

yak-ba-yak sans ke rukne ki aziyyat se ham-aghosh kare

aur jhunjhla ke tu gul-dan ko dariche se pare

phenk de jada-e-sangin ki taraf

pas-e-diwar khaDa

main sunun TuTte gul-dan ki sada

aur mere kanpte honTon se uThe

tere ehsas ki barnai ke be-Tok panapne ki dua