gul-e-rangin

tū shanāsā-e-ḳharāsh-e-uqda-e-mushkil nahīñ

ai gul-e-rañgīñ tire pahlū meñ shāyad dil nahīñ

zeb-e-mahfil hai sharīk-e-shorish-e-mahfil nahīñ

ye farāġhat bazm-e-hastī meñ mujhe hāsil nahīñ

is chaman meñ maiñ sarāpā soz-o-sāz-e-ārzū

aur terī zindagānī be-gudāz-e-ārzū

toḌ lenā shāḳh se tujh ko mirā aa.iiñ nahīñ

ye nazar ġhair-az-nigāh-e-chashm-e-sūrat-bīñ nahīñ

aah ye dast-e-jafā jo ai gul-e-rañgīñ nahīñ

kis tarah tujh ko ye samjhā.ūñ ki maiñ gulchīñ nahīñ

kaam mujh ko dīda-e-hikmat ke uljheḌoñ se kyā

dīda-bulbul se meñ kartā huuñ nazzāra terā

sau zabānoñ par bhī ḳhāmoshī tujhe manzūr hai

raaz vo kyā hai tire siine meñ jo mastūr hai

merī sūrat tū bhī ik barg-e-riyāz-e-tūr hai

maiñ chaman se duur huuñ tū bhī chaman se duur hai

mutma.in hai tū pareshāñ misl-e-bū rahtā huuñ maiñ

zaḳhmī-e-shamshīr-e-zauq-e-justujū rahtā huuñ maiñ

ye pareshānī mirī sāmān-e-jam.īyat na ho

ye jigar-sozī charāġh-e-ḳhāna-e-hikmat na ho

nā-tavānī hī mirī sarmāya-e-quvvat na ho

rashk-e-jām-e-jam mirā ā.īna-e-hairat na ho

ye talāsh-e-muttasil sham-e-jahāñ-afroz hai

tausan-e-idrāk-e-insāñ ko ḳhirām-āmoz hai

tu shanasa-e-KHarash-e-uqda-e-mushkil nahin

ai gul-e-rangin tere pahlu mein shayad dil nahin

zeb-e-mahfil hai sharik-e-shorish-e-mahfil nahin

ye faraghat bazm-e-hasti mein mujhe hasil nahin

is chaman mein main sarapa soz-o-saz-e-arzu

aur teri zindagani be-gudaz-e-arzu

toD lena shaKH se tujh ko mera aain nahin

ye nazar ghair-az-nigah-e-chashm-e-surat-bin nahin

aah ye dast-e-jafa jo ai gul-e-rangin nahin

kis tarah tujh ko ye samjhaun ki main gulchin nahin

kaam mujh ko dida-e-hikmat ke uljheDon se kya

dida-bulbul se mein karta hun nazzara tera

sau zabanon par bhi KHamoshi tujhe manzur hai

raaz wo kya hai tere sine mein jo mastur hai

meri surat tu bhi ek barg-e-riyaz-e-tur hai

main chaman se dur hun tu bhi chaman se dur hai

mutmain hai tu pareshan misl-e-bu rahta hun main

zaKHmi-e-shamshir-e-zauq-e-justuju rahta hun main

ye pareshani meri saman-e-jamiyat na ho

ye jigar-sozi charagh-e-KHana-e-hikmat na ho

na-tawani hi meri sarmaya-e-quwwat na ho

rashk-e-jam-e-jam mera aaina-e-hairat na ho

ye talash-e-muttasil sham-e-jahan-afroz hai

tausan-e-idrak-e-insan ko KHiram-amoz hai