gul-e-tar

ai gul-e-tar kis qadar dilkash hai nazzāra tirā

hāmil-e-husn-e-azal hai qalb-e-sī-pāra tirā

pattī pattī meñ tirī pesh-e-nigāh-e-ārifāñ

le rahā hai ik jahān-e-rang-o-bū añgḌā.iyāñ

faash terī diid se hai chashm-e-bīnā par ye raaz

jalva-gar hai ā.īne ke bhes meñ ā.īna-sāz

farsh ke rangīñ sahīfe gulshan-e-fānī ke phuul

jāñ-fazā hai arsh-e-dil par ye tirī shān-e-nuzūl

lekin is duniyā meñ husn-e-chand-roza kā ma.aal

baḌh rahā hai terī jānib le ke paiġhām-e-zavāl

muntashir hoñge ye aurāq-e-kitāb-e-rang-o-bū

chaak kar degī ḳhizāñ āḳhir naqāb-e-rang-o-bū

zeb-e-sar kar ke tujhe armāñ nikālā jā.egā

paañv ke nīche phir ik din rauñd Daalā jā.egā

ai gul-e-tar kis qadar dilkash hai nazzara tera

hamil-e-husn-e-azal hai qalb-e-si-para tera

patti patti mein teri pesh-e-nigah-e-arifan

le raha hai ek jahan-e-rang-o-bu angDaiyan

fash teri did se hai chashm-e-bina par ye raaz

jalwa-gar hai aaine ke bhes mein aaina-saz

farsh ke rangin sahife gulshan-e-fani ke phul

jaan-faza hai arsh-e-dil par ye teri shan-e-nuzul

lekin is duniya mein husn-e-chand-roza ka maal

baDh raha hai teri jaanib le ke paigham-e-zawal

muntashir honge ye auraq-e-kitab-e-rang-o-bu

chaak kar degi KHizan aaKHir naqab-e-rang-o-bu

zeb-e-sar kar ke tujhe arman nikala jaega

panw ke niche phir ek din raund Dala jaega