gum-shuda raste

sā.at-e-ḳhud-garī ḳhud-shanāsī

rifāqat mohabbat ke vo jāgte qāfile

jo mah-o-sāl kī gard meñ aT ga.e the

ab bhī ik gum-shuda rāste par ravāñ haiñ

ham-navā.ī ke vo rāt-din

vaqt kī gahrī andhī

guphāoñ se uTh kar

mere atrāf yuuñ jam.a hone lage haiñ

jaise mujhe mujh se mirī be-hisī kā gila kar rahe hoñ

pūchhte hoñ

ki kyā mausamoñ ke aTal dā.ere

soz-e-dil kī bhī zanjīr-e-pā haiñ

umr-e-rafta ke kis biite lamhe se pūchhūñ

vo bedār rāteñ

pur-asrār shāmeñ

guhar-bār sub.heñ

vo mānūs jazboñ se sarshār bāteñ

jo pas-e-parda-e-dard-e-dil

ab bhī soī nahīñ haiñ

vaqt ke rāste par agar

khulī aañkh kā ḳhvāb thiiñ

vāhima thiiñ

to dil se ufuq tak

ye jaltī huī surḳh tahrīr kyuuñ hai

saat-e-KHud-gari KHud-shanasi

rifaqat mohabbat ke wo jagte qafile

jo mah-o-sal ki gard mein aT gae the

ab bhi ek gum-shuda raste par rawan hain

ham-nawai ke wo raat-din

waqt ki gahri andhi

guphaon se uTh kar

mere atraf yun jama hone lage hain

jaise mujhe mujh se meri be-hisi ka gila kar rahe hon

puchhte hon

ki kya mausamon ke aTal daere

soz-e-dil ki bhi zanjir-e-pa hain

umr-e-rafta ke kis bite lamhe se puchhun

wo bedar raaten

pur-asrar shamen

guhar-bar subhen

wo manus jazbon se sarshaar baaten

jo pas-e-parda-e-dard-e-dil

ab bhi soi nahin hain

waqt ke raste par agar

khuli aankh ka KHwab thin

wahima thin

to dil se ufuq tak

ye jalti hui surKH tahrir kyun hai