gum-shuda waqt

sirf terī talāsh rahtī hai

aks har vaqt aa ke terā hī

man ke āñgan meñ raqs kartā hai

jaise koī udaas sī ḳhushbū

mere tan-man meñ phail jaatī hai

lauT jaatī huuñ apne maazī meñ

terī yādeñ tire ḳhayāl liye

vo sabhī din mirī vo sab rāteñ

yaad aatī haiñ terī sab bāteñ

vaqt phir aa ke tham sā jaatā hai

dhaḌkaneñ dil kī ruk sī jaatī haiñ

phir achānak saham sī jaatī huuñ

TuuT kar maiñ bikhar sī jaatī huuñ

hasrateñ apnī apne ḳhvāboñ ko

is tarah phir sameT letī huuñ

terī yādeñ lapeT letī huuñ

baiTh kar phir ye sochtī huuñ maiñ

gum-shuda vaqt lauTtā hai kyā

sirf teri talash rahti hai

aks har waqt aa ke tera hi

man ke aangan mein raqs karta hai

jaise koi udas si KHushbu

mere tan-man mein phail jati hai

lauT jati hun apne mazi mein

teri yaaden tere KHayal liye

wo sabhi din meri wo sab raaten

yaad aati hain teri sab baaten

waqt phir aa ke tham sa jata hai

dhaDkanen dil ki ruk si jati hain

phir achanak saham si jati hun

TuT kar main bikhar si jati hun

hasraten apni apne KHwabon ko

is tarah phir sameT leti hun

teri yaaden lapeT leti hun

baiTh kar phir ye sochti hun main

gum-shuda waqt lauTta hai kya