gurez

mirā junūn-e-vafā hai zavāl-āmāda

shikast ho gayā terā fusūn-e-zebā.ī

un ārzūoñ pe chhā.ī hai gard-e-māyūsī

jinhoñ ne tere tabassum meñ parvarish paa.ī

fareb-e-shauq ke rañgīñ tilism TuuT ga.e

haqīqatoñ ne havādis se phir jilā paa.ī

sukūn-o-ḳhvāb ke parde sarakte jaate haiñ

dimāġh-o-dil meñ haiñ vahshat kī kār-farmā.ī

vo taare jinmeñ mohabbat kā nuur tābāñ thā

vo taare Duub ga.e le ke rañg-o-ra.anā.ī

sulā ga.ī thiiñ jinheñ terī multafit nazreñ

vo dard jaag uThe phir se le ke añgḌā.ī

ajiib ālam-e-afsurdagī hai rū-ba-faroġh

na jab nazar ko taqāzā na dil tamannā.ī

tirī nazar tire gesū tirī jabīñ tire lab

mirī udās-tabī.at hai sab se uktā.ī

maiñ zindagī ke haqā.eq se bhaag aayā thā

ki mujh ko ḳhud meñ chhupā.e tirī fusūñ-zā.ī

magar yahāñ bhī ta.āqub kiyā haqā.eq ne

yahāñ bhī mil na sakī jannat-e-shakebā.ī

har ek haath meñ le kar hazār ā.īne

hayāt band darīchoñ se bhī guzar aa.ī

mire har ek taraf ek shor guuñj uThā

aur us meñ Duub ga.ī ishratoñ kī shahnā.ī

kahāñ talak kare chhup-chhup ke naġhma-pairā.ī

vo dekh sāmne ke pur-shikoh aivāñ se

kisī kirā.e kī laḌkī kī chīḳh Takrā.ī

vo phir samāj ne do pyaar karne vāloñ ko

sazā ke taur par baḳhshī tavīl tanhā.ī

phir ek tīra-o-tārīk jhoñpaḌī ke tale

sisakte bachche pe beva kī aañkh bhar aa.ī

vo phir bikī kisī majbūr kī javāñ beTī

vo phir jhukā kisī dar par ġhurūr-e-barnā.ī

vo phir kisānoñ ke majme.a pe gun-mashīnoñ se

huqūq-yāfta tabqe ne aag barsā.ī

sukūt-e-halqa-e-zindāñ se ek guuñj uThī

aur is ke saath mire sāthiyoñ kī yaad aa.ī

nahīñ nahīñ mujhe yuuñ multafit nazar se na dekh

nahīñ nahīñ mujhe ab tāb-e-naġhma-pairā.ī

mirā junūn-e-vafā hai zavāl-āmāda

shikast ho gayā terā fusūn-e-zebā.ī

mera junun-e-wafa hai zawal-amada

shikast ho gaya tera fusun-e-zebai

un aarzuon pe chhai hai gard-e-mayusi

jinhon ne tere tabassum mein parwarish pai

fareb-e-shauq ke rangin tilism TuT gae

haqiqaton ne hawadis se phir jila pai

sukun-o-KHwab ke parde sarakte jate hain

dimagh-o-dil mein hain wahshat ki kar-farmai

wo tare jinmen mohabbat ka nur taban tha

wo tare Dub gae le ke rang-o-ranai

sula gai thin jinhen teri multafit nazren

wo dard jag uThe phir se le ke angDai

ajib aalam-e-afsurdagi hai ru-ba-farogh

na jab nazar ko taqaza na dil tamannai

teri nazar tere gesu teri jabin tere lab

meri udas-tabiat hai sab se uktai

main zindagi ke haqaeq se bhag aaya tha

ki mujh ko KHud mein chhupae teri fusun-zai

magar yahan bhi taaqub kiya haqaeq ne

yahan bhi mil na saki jannat-e-shakebai

har ek hath mein le kar hazar aaine

hayat band darichon se bhi guzar aai

mere har ek taraf ek shor gunj uTha

aur us mein Dub gai ishraton ki shahnai

kahan talak kare chhup-chhup ke naghma-pairai

wo dekh samne ke pur-shikoh aiwan se

kisi kirae ki laDki ki chiKH Takrai

wo phir samaj ne do pyar karne walon ko

saza ke taur par baKHshi tawil tanhai

phir ek tira-o-tarik jhonpaDi ke tale

sisakte bachche pe bewa ki aankh bhar aai

wo phir biki kisi majbur ki jawan beTi

wo phir jhuka kisi dar par ghurur-e-barnai

wo phir kisanon ke majmea pe gun-mashinon se

huquq-yafta tabqe ne aag barsai

sukut-e-halqa-e-zindan se ek gunj uThi

aur is ke sath mere sathiyon ki yaad aai

nahin nahin mujhe yun multafit nazar se na dekh

nahin nahin mujhe ab tab-e-naghma-pairai

mera junun-e-wafa hai zawal-amada

shikast ho gaya tera fusun-e-zebai