gurez

un se milne kī tamanna dil-e-betāb na kar

sochtā huuñ ki mohabbat kī jahāñ qadr nahīñ

jazb-e-dil jazba-e-ulfat kī jahāñ qadr nahīñ

aise māhaul se behtar hai kinārā kar luuñ

mahfileñ chhoḌ ke tanhā.ī gavārā kar luuñ

un se milne kī tamanna dil-e-betāb na kar

jis ko mā'lūm nahīñ pyaar kī manzil kyā hai

jis ko ehsās nahīñ dard-bharā dil kyā hai

aise be-dard zamāne ke nazāroñ ko salām

bevafā husn kī rangīn bahāroñ ko salām

un se milne kī tamanna dil-e-betāb na kar

ahl-e-dil kushta-e-uftād-e-zamāna hoñ jahāñ

bā-vafā tīr-e-malāmat kā nishāna hoñ jahāñ

aisī rāhoñ meñ vafāoñ kā guzar kyā mā'nī

in ḳhalāoñ meñ mohabbat kā safar kyā mā'nī

un se milne kī tamanna dil-e-betāb na kar

kaun kahtā hai ki hālāt badal jā.eñge

kaun kahtā hai ki din-rāt badal jā.eñge

ruuh ehsās ke bojhoñ se dabī jaatī hai

zindagī dard ke sāñche meñ Dhalī jaatī hai

un se milne kī tamanna dil-e-betāb na

un se milne ki tamanna dil-e-betab na kar

sochta hun ki mohabbat ki jahan qadr nahin

jazb-e-dil jazba-e-ulfat ki jahan qadr nahin

aise mahaul se behtar hai kinara kar lun

mahfilen chhoD ke tanhai gawara kar lun

un se milne ki tamanna dil-e-betab na kar

jis ko ma'lum nahin pyar ki manzil kya hai

jis ko ehsas nahin dard-bhara dil kya hai

aise be-dard zamane ke nazaron ko salam

bewafa husn ki rangin bahaaron ko salam

un se milne ki tamanna dil-e-betab na kar

ahl-e-dil kushta-e-uftad-e-zamana hon jahan

ba-wafa tir-e-malamat ka nishana hon jahan

aisi rahon mein wafaon ka guzar kya ma'ni

in KHalaon mein mohabbat ka safar kya ma'ni

un se milne ki tamanna dil-e-betab na kar

kaun kahta hai ki haalat badal jaenge

kaun kahta hai ki din-raat badal jaenge

ruh ehsas ke bojhon se dabi jati hai

zindagi dard ke sanche mein Dhali jati hai

un se milne ki tamanna dil-e-betab na