guru-nanak

gurū-nānak jise kahte haiñ vo ik mard-e-kāmil thā

ki us ke paas siine meñ taqaddus-āfrīñ dil thā

vo gūñjā naġhma-e-nāhīd ban kar āsmānoñ meñ

liyā jaatā hai naam us kā muqaddas dāstānoñ meñ

haqīqat apnī manvā.ī haqīqat-āshnā ho kar

jo uTThā ibtidā ho kar to baiThā intihā ho kar

sabaq insāniyat kā dene aayā ibn-e-ādam ko

taraqqī kī taraf le jaane vaalā ahl-e-ālam ko

zamīñ bhī us kā lohā maan kar sonā ugaltī thī

ki jis ke dabdabe se charḳh kī chhātī dahaltī thī

vo aayā thā miTāne ke liye tafrīq maz.hab kī

dam-e-āḳhir bhī kī jis ne itā.at ek hī rab kī

vo insāñ jis ke qadmoñ par zamāna sar jhukānā thā

tarīq-e-guftugū se ġhair ko apnā banātā thā

vo rahbar jis ne gumrāhoñ kī aksar peshvā.ī kī

bhalā.ī kī hamesha jis ne bhī us se burā.ī kī

granthī raag sun kar aadmī bedār hotā hai

zamāne kī nazar meñ sāhab-e-kirdār hotā hai

falak bhī tāl-bandī kī zamīñ par naaz kartā hai

ki us kā tā.ir-e-dil arsh par parvāz kartā hai

gurū-nānak kī kam se kam itā.at hai kiye hote

asar ke motiyoñ se dāman-e-dil bhar liye hote

guru-nanak jise kahte hain wo ek mard-e-kaamil tha

ki us ke pas sine mein taqaddus-afrin dil tha

wo gunja naghma-e-nahid ban kar aasmanon mein

liya jata hai nam us ka muqaddas dastanon mein

haqiqat apni manwai haqiqat-ashna ho kar

jo uTTha ibtida ho kar to baiTha intiha ho kar

sabaq insaniyat ka dene aaya ibn-e-adam ko

taraqqi ki taraf le jaane wala ahl-e-alam ko

zamin bhi us ka loha man kar sona ugalti thi

ki jis ke dabdabe se charKH ki chhati dahalti thi

wo aaya tha miTane ke liye tafriq mazhab ki

dam-e-aKHir bhi ki jis ne itaat ek hi rab ki

wo insan jis ke qadmon par zamana sar jhukana tha

tariq-e-guftugu se ghair ko apna banata tha

wo rahbar jis ne gumrahon ki aksar peshwai ki

bhalai ki hamesha jis ne bhi us se burai ki

granthi rag sun kar aadmi bedar hota hai

zamane ki nazar mein sahab-e-kirdar hota hai

falak bhi tal-bandi ki zamin par naz karta hai

ki us ka tair-e-dil arsh par parwaz karta hai

guru-nanak ki kam se kam itaat hai kiye hote

asar ke motiyon se daman-e-dil bhar liye hote