guzarish

ye guzārish hai duur chal do tum

is se pahle ki pyaar kar baiThūñ

ḳhvāb āñkhoñ meñ phir na aa jaa.eñ

raat bhī be-qarār kar baiThūñ

kahīñ aisā na ho takalluf ko

dil kā rishta samajh le dil merā

is tarah paas paas rahne se

tum ko apnā samajh le dil merā

yuuñ hī kah do ki aaoge milne

aur maiñ intizār kar baiThūñ

roz milnā kisī bahāne se

merī aadat kahīñ na ban jaa.e

tum se jo an-kahā sā rishta hai

vo mohabbat kahīñ na ban jaa.e

ye samajh kar tumhārā āñchal hai

āñkhoñ ko ashk-bār kar baiThūñ

soch kar ye ki tum sambhāloge

maiñ kahīñ be-sabab na gir jā.ūñ

ye samajh kar ki tum sameToge

aur ziyāda na maiñ bikhar jā.ūñ

is bharose meñ tum siyoge ise

pairahan taar taar kar baiThūñ

ye guzarish hai dur chal do tum

is se pahle ki pyar kar baiThun

KHwab aankhon mein phir na aa jaen

raat bhi be-qarar kar baiThun

kahin aisa na ho takalluf ko

dil ka rishta samajh le dil mera

is tarah pas pas rahne se

tum ko apna samajh le dil mera

yun hi kah do ki aaoge milne

aur main intizar kar baiThun

roz milna kisi bahane se

meri aadat kahin na ban jae

tum se jo an-kaha sa rishta hai

wo mohabbat kahin na ban jae

ye samajh kar tumhaara aanchal hai

aankhon ko ashk-bar kar baiThun

soch kar ye ki tum sambhaaloge

main kahin be-sabab na gir jaun

ye samajh kar ki tum sameToge

aur ziyaada na main bikhar jaun

is bharose mein tum siyoge ise

pairahan tar tar kar baiThun