gyan

ye chatiyal sarzamīñ

tum ko milī

to tum ne be-barg-o-gayāh Tiile par

ik ma.abad banā Daalā

aur us meñ ek but rakkhā

jise tum ne tarāshā

aadmī ke ustuḳhvāñ se

jis ke charnoñ meñ chaḌhāvā laa.e tum

to apne bhaa.ī kā

aur us ke hoñT ab tak ḳhuun kī laalī se rangīñ haiñ

zabāñ ab tak lahū ke zā.iqe se tar hai

laao aur nazrāna

ki ye ma.abad hai

maiñ but huuñ

mire hī tum pujārī ho

ye chatiyal sarzamīñ

mujh ko milī

to maiñ ne bhūrī charcharātī ḳhushk miTTī ko pasīne kī namī baḳhshī

mire ḳhuuñ kī harārat ne zamīñ ke sang-e-yaḳh-basta ko pighlāyā

zamīñ kī chhātiyoñ se ziist ke sote bahe

rangoñ ke chashme har taraf phūTe

ye dhartī sabz chādar oḌh kar dulhan banī niklī

aur is chādar meñ maiñ ne nuur ke dhāge piro Daale

ye ik tum ho

ki mere ḳhuun se ma.abad banāte ho

ye ik maiñ huuñ

ki apne nuur se dhartī ke mandir ko sajātā huuñ

ye chatiyal sarzamin

tum ko mili

to tum ne be-barg-o-gayah Tile par

ek mabad bana Dala

aur us mein ek but rakkha

jise tum ne tarasha

aadmi ke ustuKHwan se

jis ke charnon mein chaDhawa lae tum

to apne bhai ka

aur us ke honT ab tak KHun ki lali se rangin hain

zaban ab tak lahu ke zaiqe se tar hai

lao aur nazrana

ki ye mabad hai

main but hun

mere hi tum pujari ho

ye chatiyal sarzamin

mujh ko mili

to main ne bhuri charcharaati KHushk miTTi ko pasine ki nami baKHshi

mere KHun ki hararat ne zamin ke sang-e-yaKH-basta ko pighlaya

zamin ki chhatiyon se zist ke sote bahe

rangon ke chashme har taraf phuTe

ye dharti sabz chadar oDh kar dulhan bani nikli

aur is chadar mein main ne nur ke dhage piro Dale

ye ek tum ho

ki mere KHun se mabad banate ho

ye ek main hun

ki apne nur se dharti ke mandir ko sajata hun