habil chup hai

kab talak gehūñ kakḌī

pyaaz aur masūr hī khāte raheñ

apne ajdād ke

sab gunāhoñ kā bojh

ab uThāte raheñ

ham jo qābīl qātil kī

aulād haiñ

jis tarah ke bhī haiñ

kis kī ījād haiñ

ham ne chakkhā nahīñ

koī jannat kā phal

ham ne dekhā nahīñ

apne ajdād kā koī aaj aur na kal

kyoñ utaar ga.ī

ham pe aisī hī bhuuk aur pyaas

anginat ham ne ashjār bhī haiñ ugaa.e hue

phir bhī ajdād par jo utārī ga.ī dhuup

ham bhī isī meñ jalā.e ga.e

jism kā to hamārā bhī saaya

aur ajdād kā bhī

rahā hai hamesha hī mahv-e-sujūd

phir bhī ham par aur un par

lagā.ī ga.ī haiñ ye kaisī quyūd

kis kī qurbānī ko sharaf baḳhshā gayā

aur virāsat kā haqdār Thahrā hai kaun

ham hī qābīl kī kul kamā.ī haiñ kyoñ

ik tamāshā haiñ

to phir tamāshā.ī kyoñ

vo to ajdād the

jo utāre ga.e the falak se

magar tā-qayāmat

zamīñ par hamārī ye rusvā.ī kyoñ

kab talak gehun kakDi

pyaz aur masur hi khate rahen

apne ajdad ke

sab gunahon ka bojh

ab uThate rahen

hum jo qabil qatil ki

aulad hain

jis tarah ke bhi hain

kis ki ijad hain

hum ne chakkha nahin

koi jannat ka phal

hum ne dekha nahin

apne ajdad ka koi aaj aur na kal

kyon utar gai

hum pe aisi hi bhuk aur pyas

anginat hum ne ashjar bhi hain ugae hue

phir bhi ajdad par jo utari gai dhup

hum bhi isi mein jalae gae

jism ka to hamara bhi saya

aur ajdad ka bhi

raha hai hamesha hi mahw-e-sujud

phir bhi hum par aur un par

lagai gai hain ye kaisi quyud

kis ki qurbani ko sharaf baKHsha gaya

aur wirasat ka haqdar Thahra hai kaun

hum hi qabil ki kul kamai hain kyon

ek tamasha hain

to phir tamashai kyon

wo to ajdad the

jo utare gae the falak se

magar ta-qayamat

zamin par hamari ye ruswai kyon