hasil ka safar

tanhā.ī kī ḳhāmoshī meñ

jī bekār ulajhtā hai

zaar o pareshāñ rahtā huuñ

lekin logoñ ke jamghaT meñ

ik mohmal se shor-o-ġhul meñ

shaḳhsiyyat samjhaute ke tezāb meñ hal ho jaatī hai

dil hotā hai aur pashemāñ

tanhā.ī kī ḳhāmoshī meñ

bhuut shikast-o-nākāmī ke

ik ik kar ke mujh se jab bhī mahv-e-takallum hote haiñ

mujh ko apnā ūñchā sā qad chhoTā chhoTā lagtā hai

maiñ ik zarra ek sitāra ban jaatā huuñ

lekin maiñ vo taara kab huuñ

kab in tāroñ meñ shāmil huuñ

le ke ujālā jo māñge kā

apnī aab baḌhāne kī nāhaq sī koshish karte haiñ

tanhā.ī kī ḳhāmoshī!

ye ghūñT hai ik zahr-e-qātil kā

ghūñT hai ik amrit kā bhī ye

ghūñT maiñ donoñ pī letā huuñ

raat ga.e ujle bistar par

so jaatā huuñ

pahlī kiran ke saath

sunahrī pagDanDī kā ho jaatā huuñ

tanhai ki KHamoshi mein

ji bekar ulajhta hai

zar o pareshan rahta hun

lekin logon ke jamghaT mein

ek mohmal se shor-o-ghul mein

shaKHsiyyat samjhaute ke tezab mein hal ho jati hai

dil hota hai aur pasheman

tanhai ki KHamoshi mein

bhut shikast-o-nakaami ke

ek ek kar ke mujh se jab bhi mahw-e-takallum hote hain

mujh ko apna uncha sa qad chhoTa chhoTa lagta hai

main ek zarra ek sitara ban jata hun

lekin main wo tara kab hun

kab in taron mein shamil hun

le ke ujala jo mange ka

apni aab baDhane ki nahaq si koshish karte hain

tanhai ki KHamoshi!

ye ghunT hai ek zahr-e-qatil ka

ghunT hai ek amrit ka bhi ye

ghunT main donon pi leta hun

raat gae ujle bistar par

so jata hun

pahli kiran ke sath

sunahri pagDanDi ka ho jata hun