hai meri soch mein raqsan sabhi jazbaat ka rang

hai mirī soch meñ raqsāñ sabhī jazbāt kā rang

aur har rang se baḌh kar hai tirī zaat kā rang

hai gulābī magar ik shoḳh ke isbāt kā rang

zard inkār pe hairat ke savālāt kā rang

malgajā mailā sā majbūri-e-hālāt kā rang

surma.ī rang judā.ī kī hai sā.āt kā rang

kyā yahī rang hai vahshat kā siyah raat kā rang

yā ubharte hue phir zehn meñ shub.hāt kā rang

kāsnī dard kā aur maut kī sakrāt kā rang

aas kī qaus-o-quzah harf-e-munājāt kā rang

nazr-e-ehsās-e-gunah ho gayā din raat kā rang

hai ravāñ ḳhuun sā be-rabt ḳhayālāt kā rang

champa.ī maazī kā yādoñ bharī bārāt kā rang

shoḳh Thahrā hai bhaḌakte hue jazbāt kā rang

jaltā hai shauq kī tābish se mulāqāt kā rang

ḳhauf kā rang mire fardā ke ḳhadshāt kā rang

nuur hī nuur magar qibla-e-hājāt kā rang

ek har lahza badaltā huā ā.īna hai

kyoñ badaltā nahīñ phir haal kā hālāt kā rang

aa jā bhar de nā vahī mujh meñ ḳharābāt kā rang

mujh ko aa jaa.e tarīqa ki jiyūñ aaj meñ maiñ

aa ki badle to zarā mere ḳhayālāt kā rang

hai meri soch mein raqsan sabhi jazbaat ka rang

aur har rang se baDh kar hai teri zat ka rang

hai gulabi magar ek shoKH ke isbaat ka rang

zard inkar pe hairat ke sawalat ka rang

malgaja maila sa majburi-e-haalat ka rang

surmai rang judai ki hai saat ka rang

kya yahi rang hai wahshat ka siyah raat ka rang

ya ubharte hue phir zehn mein shubhat ka rang

kasni dard ka aur maut ki sakraat ka rang

aas ki qaus-o-quzah harf-e-munajat ka rang

nazr-e-ehsas-e-gunah ho gaya din raat ka rang

hai rawan KHun sa be-rabt KHayalat ka rang

champai mazi ka yaadon bhari baraat ka rang

shoKH Thahra hai bhaDakte hue jazbaat ka rang

jalta hai shauq ki tabish se mulaqat ka rang

KHauf ka rang mere farda ke KHadshat ka rang

nur hi nur magar qibla-e-hajat ka rang

ek har lahza badalta hua aaina hai

kyon badalta nahin phir haal ka haalat ka rang

aa ja bhar de na wahi mujh mein KHarabaat ka rang

mujh ko aa jae tariqa ki jiyun aaj mein main

aa ki badle to zara mere KHayalat ka rang