halchal

mujhe achchhā nahīñ lagtā

khaḌā ḳhāmosh sā dariyā

koī halchal ho

tūfāñ ho

koī to bādbāñ TuuTe

koī to nāḳhudā aisā ho jo bād-e-muḳhālif ko

palaT de zor-e-bāzū se

nā kashtī Dagmagā.e us kī lahroñ ke talātum par

nā kashtī Doltī jaa.e havā ke ruḳh pe sāhil par

bahut girdāb bhī hoñge

bahut bhauñchāl ā.eñge

ho aisā nā-ḳhudā ki jo bhañvar meñ Duub na jaa.e

ḳhud apnī zaat ke īqān par bāhar nikal aa.e

yaqīñ ho aap par to sāhiloñ ko chhoḌ dete haiñ

bharosa ho basīrat par to dariyā moḌ dete haiñ

yuuñ apne aap meñ tūfān kī halchal machā rakkho

ki tuġhyānī nahīñ aatī to dariyā suukh jaate haiñ

mujhe achchha nahin lagta

khaDa KHamosh sa dariya

koi halchal ho

tufan ho

koi to baadban TuTe

koi to naKHuda aisa ho jo baad-e-muKHalif ko

palaT de zor-e-bazu se

na kashti Dagmagae us ki lahron ke talatum par

na kashti Dolti jae hawa ke ruKH pe sahil par

bahut girdab bhi honge

bahut bhaunchaal aaenge

ho aisa na-KHuda ki jo bhanwar mein Dub na jae

KHud apni zat ke iqan par bahar nikal aae

yaqin ho aap par to sahilon ko chhoD dete hain

bharosa ho basirat par to dariya moD dete hain

yun apne aap mein tufan ki halchal macha rakkho

ki tughyani nahin aati to dariya sukh jate hain