hallucination

maiñ apne band kamre meñ paḌā huuñ

aur ik dīvār par nazreñ jamā.e

manāzir ke ajūbe dekhtā huuñ

usī dīvār meñ koī ḳhalā hai

mujhe jo ġhaar jaisā lag rahā hai

vahāñ makḌī ne jaal bun liyā hai

aur ab apne hī jaal meñ phañsī hai

vahīñ par ek murda chhipkilī hai

ka.ī sadiyoñ se jo sākit paḌī hai

ab us par kaa.ī jamtī jā rahī hai

aur us meñ ek jañgal dikh rahā hai

daraḳhtoñ se parinde gir rahe haiñ

kulhāḌī shāḳh par laTkī huī hai

lakaḌhāre pe gīdaḌ hañs rahe

musalsal tez bārish ho rahī hai

kisī patte se gir kar ek qatra

achānak ek samundar ban gayā hai

samundar naav se laḌne lagā hai

machherā machhliyoñ meñ ghir gayā hai

aur ab patvār siine se lagā kar

vo niile āsmāñ ko dekhtā hai

jo yak-dam zard paḌtā jā rahā hai

vo kaise ret bantā jā rahā hai

mujhe ab sirf sahrā dikh rahā hai

aur us meñ dhuum kī chādar bichhī hai

magar vo ek jagah se phaT rahī hai

vahāñ par ek saaya nāchtā hai

jahāñ bhī pair dhartā hai vahāñ par

sunahre phuul khilte jā rahe hai

ye sahrā baaġh bantā jā rahā hai

aur us meñ titliyāñ dikhtī haiñ

paroñ meñ jin ke niilī raushnī hai

vo har pal tez hotī jā rahī hai

so merī aañkh meñ chubhne lagī hai

so maiñ ne haath āñkhoñ par rakhe haiñ

aur ab uñglī haTā kar dekhtā huuñ

ki apne band kamre meñ paḌā huuñ

aur ik dīvār ke aage khaḌā huuñ

main apne band kamre mein paDa hun

aur ek diwar par nazren jamae

manazir ke ajube dekhta hun

usi diwar mein koi KHala hai

mujhe jo ghaar jaisa lag raha hai

wahan makDi ne jal bun liya hai

aur ab apne hi jal mein phansi hai

wahin par ek murda chhipkili hai

kai sadiyon se jo sakit paDi hai

ab us par kai jamti ja rahi hai

aur us mein ek jangal dikh raha hai

daraKHton se parinde gir rahe hain

kulhaDi shaKH par laTki hui hai

lakaDhaare pe gidaD hans rahe

musalsal tez barish ho rahi hai

kisi patte se gir kar ek qatra

achanak ek samundar ban gaya hai

samundar naw se laDne laga hai

machhera machhliyon mein ghir gaya hai

aur ab patwar sine se laga kar

wo nile aasman ko dekhta hai

jo yak-dam zard paDta ja raha hai

wo kaise ret banta ja raha hai

mujhe ab sirf sahra dikh raha hai

aur us mein dhum ki chadar bichhi hai

magar wo ek jagah se phaT rahi hai

wahan par ek saya nachta hai

jahan bhi pair dharta hai wahan par

sunahre phul khilte ja rahe hai

ye sahra bagh banta ja raha hai

aur us mein titliyan dikhti hain

paron mein jin ke nili raushni hai

wo har pal tez hoti ja rahi hai

so meri aankh mein chubhne lagi hai

so main ne hath aankhon par rakhe hain

aur ab ungli haTa kar dekhta hun

ki apne band kamre mein paDa hun

aur ek diwar ke aage khaDa hun