hum donon mein se ek

ham bahut thoḌe log haiñ

vo bahut zyāda

ham lā-parvāh haiñ ḳhud apnī zaat se

hameñ ek dūsre ke mafādāt kī kyā fikr

vo aapas meñ shīr-o-shakar haiñ

aur hameñ kamzor rakhne ke liye

sāz-bāz karte rahte haiñ

un kī ta.adād baḌhtī jā rahī hai

joñ joñ hamāre log

hameñ chhoḌ kar

un ke paas jā rahe haiñ

ham kisī ko nahīñ rokte

balki koī ek qadam bhī aage baḌhā.e

to farz kar lete haiñ

ki vo un kī jānib baḌh rahā hai

vo muntazir dekhte rahte haiñ

kab koī hamāre dā.ere se thoḌā sā bāhar nikle

aur vo use rijhā kar apne saath milā leñ

un ke paas ga.e logoñ meñ

ho saktā hai ab koī afsos kartā ho

aur vāpas aanā chāhe

magar ham us kī parvāh bahut kam karte haiñ

aur ye mumkin bhī nahīñ hai

kyūñki

un ke saath vaqt zaa.e karne vāloñ ke paas

hamāre liye vaqt bach nahīñ saktā

vo intizār meñ haiñ

bas ham meñ se ek āḳhirī bach jaa.e

to vo use patthar maar kar halāk kar Dāleñ

ham ek dūsre ko dekh rahe haiñ

aur Dar rahe haiñ

kyā ham donoñ meñ se koī

dūsre ko patthar māregā!

hum bahut thoDe log hain

wo bahut zyaada

hum la-parwah hain KHud apni zat se

hamein ek dusre ke mafadat ki kya fikr

wo aapas mein shir-o-shakar hain

aur hamein kamzor rakhne ke liye

saz-baz karte rahte hain

un ki tadad baDhti ja rahi hai

jon jon hamare log

hamein chhoD kar

un ke pas ja rahe hain

hum kisi ko nahin rokte

balki koi ek qadam bhi aage baDhae

to farz kar lete hain

ki wo un ki jaanib baDh raha hai

wo muntazir dekhte rahte hain

kab koi hamare daere se thoDa sa bahar nikle

aur wo use rijha kar apne sath mila len

un ke pas gae logon mein

ho sakta hai ab koi afsos karta ho

aur wapas aana chahe

magar hum us ki parwah bahut kam karte hain

aur ye mumkin bhi nahin hai

kyunki

un ke sath waqt zae karne walon ke pas

hamare liye waqt bach nahin sakta

wo intizar mein hain

bas hum mein se ek aaKHiri bach jae

to wo use patthar mar kar halak kar Dalen

hum ek dusre ko dekh rahe hain

aur Dar rahe hain

kya hum donon mein se koi

dusre ko patthar marega!