hum

ham bhāgte rahte haiñ

ik ḳhvāb se

aur us ḳhvāb se vābasta har dukh se

Darte rahte haiñ

ham jāgte rahte haiñ

har raat kisī ḳhud-sāḳhta uljhan ko suljhāne kī ḳhātir ham ḳhud se ulajhte haiñ

phir din chaḌh jaatā hai ham dekhte rahte haiñ vo sab kuchh jo ham dekh nahīñ sakte

haiñ lekin dekhnā paḌtā hai ye āñkheñ bebas ho kar dekhtī rahtī haiñ aur ham ye

sochte haiñ bīnā.ī bhī kaisī majbūrī hai bolte rahte haiñ vo sab kuchh jo ham aur

kisī se kah nahīñ paate apne aap se kah dete haiñ kabhī kabhī to koī palaT kar

pūchh bhī letā hai kyā mujh se kahā kuchh bhūlte rahte haiñ phone fridge meñ aur

chaa.e chūlhe par rakh kar bhuul ga.e to aisī koī baat nahīñ hai kabhī kabhī bas

dhyān kahīñ baT jaa.e to phir chalte chalte rastā ojhal ho jaatā hai emergency

brake lagānī paḌ jaatī hai apne aap ko ḳhud hī DhūñD ke laanā ho to thoḌī

pareshānī hotī hai ham sunte rahte haiñ vo āvāzeñ jo kisī chehre se nahīñ miltīñ

vo bāteñ jo hoñT adā nahīñ kar paate aur kaan nahīñ sun sakte haiñ ham sun

lete haiñ ham bhīgte rahte haiñ andar hī andar āñkhoñ meñ aur halaq meñ aur

siine meñ kahīñ ik sho.ala hai jo sard nahīñ paḌtā hai kabhī ham laḌte rahte haiñ

apne aap se apnī bīnā.ī se goyā.ī se aur samā.at se ham marte rahte haiñ har

roz kahīñ aur phir zinda ho jaate haiñ aur phir marte haiñ marne aur zinda hone

kā khel kisī din ḳhatm huā to mar jā.eñge

hum bhagte rahte hain

ek KHwab se

aur us KHwab se wabasta har dukh se

Darte rahte hain

hum jagte rahte hain

har raat kisi KHud-saKHta uljhan ko suljhane ki KHatir hum KHud se ulajhte hain

phir din chaDh jata hai hum dekhte rahte hain wo sab kuchh jo hum dekh nahin sakte

hain lekin dekhna paDta hai ye aankhen bebas ho kar dekhti rahti hain aur hum ye

sochte hain binai bhi kaisi majburi hai bolte rahte hain wo sab kuchh jo hum aur

kisi se kah nahin pate apne aap se kah dete hain kabhi kabhi to koi palaT kar

puchh bhi leta hai kya mujh se kaha kuchh bhulte rahte hain phone fridge mein aur

chae chulhe par rakh kar bhul gae to aisi koi baat nahin hai kabhi kabhi bas

dhyan kahin baT jae to phir chalte chalte rasta ojhal ho jata hai emergency

brake lagani paD jati hai apne aap ko KHud hi DhunD ke lana ho to thoDi

pareshani hoti hai hum sunte rahte hain wo aawazen jo kisi chehre se nahin miltin

wo baaten jo honT ada nahin kar pate aur kan nahin sun sakte hain hum sun

lete hain hum bhigte rahte hain andar hi andar aankhon mein aur halaq mein aur

sine mein kahin ek shoala hai jo sard nahin paDta hai kabhi hum laDte rahte hain

apne aap se apni binai se goyai se aur samaat se hum marte rahte hain har

roz kahin aur phir zinda ho jate hain aur phir marte hain marne aur zinda hone

ka khel kisi din KHatm hua to mar jaenge