hum ki hero nahin

ham ḳhizāñ kī ġhudūd se chal kar

ḳhud december kī kokh tak aa.e

ham ko fōtpath par hayāt milī

ham patañgoñ pe leT kar ro.e

sūrajoñ ne hamāre hoñToñ par

apne hoñToñ kā shahd Tapkāyā

aur hamārī shikam tasallī ko

june kī chhātiyoñ meñ duudh aayā

barf bistar banī hamāre liye

aur dozaḳh ke surḳh resham se

ham ne apne liye lihāf bune

zard shiryān ko dhueñ se bharā

phephaḌoñ par siyāh raakh malī

nāgā-sākī meñ phuul kāsht kiye

nazm bairūt meñ mukammal kī

lorkā ko kalā.ī par bāñdhā

ho-chi-minh ko niyām meñ rakhā

sāḌhe lenin baje schōl ga.e

sub.h-e-īsā ko shaam meñ rakkhā

armuġhān-e-hijāz meñ so.e

hollywōd kī azaan par jaage

Diary meñ sudhār thā likhā

dard ko falsafe kī lorī dī

zaḳhm par shā.irī kā phāhā rakkhā

tan mashīnoñ kī thaap par thirke

dil kitāboñ kī taal par nāchā

ham ne fir.aun kā qasīda likhā

ham ne kuufe meñ marsiye beche

ham ne bosoñ kā kārobār kiyā

ham ne āñkhoñ ke aa.ine beche

zindagī kī lagan nahīñ ham ko

zindagī kī hameñ thakan bhī nahīñ

ham ki hero nahīñ vilen bhī nahīñ

hum KHizan ki ghudud se chal kar

KHud december ki kokh tak aae

hum ko footpath par hayat mili

hum patangon pe leT kar roe

surajon ne hamare honTon par

apne honTon ka shahd Tapkaya

aur hamari shikam tasalli ko

june ki chhatiyon mein dudh aaya

barf bistar bani hamare liye

aur dozaKH ke surKH resham se

hum ne apne liye lihaf bune

zard shiryan ko dhuen se bhara

phephaDon par siyah rakh mali

naga-saki mein phul kasht kiye

nazm bairut mein mukammal ki

lorka ko kalai par bandha

ho-chi-minh ko niyam mein rakha

saDhe lenin baje school gae

subh-e-isa ko sham mein rakkha

armughan-e-hijaz mein soe

hollywood ki azan par jage

Diary mein sudhaar tha likha

dard ko falsafe ki lori di

zaKHm par shairi ka phaha rakkha

tan mashinon ki thap par thirke

dil kitabon ki tal par nacha

hum ne firaun ka qasida likha

hum ne kufe mein marsiye beche

hum ne boson ka karobar kiya

hum ne aankhon ke aaine beche

zindagi ki lagan nahin hum ko

zindagi ki hamein thakan bhi nahin

hum ki hero nahin wilen bhi nahin