hum napte rahte hain roz

maut ham se kitnī duur hai

ek inchi-tape ḳharīd kar laa.e haiñ ham

aur farzī fāsle se maut ko

apne aap se nāpte haiñ

din ko gōd-morning kahte hue

sūraj kī raushnī se ham pūchhte haiñ

aaj kyā hamārā number hai

sūraj khilkhilātā hai hamārī buzdilī par

hameñ us kī hañsī zahr lagtī hai

lekin ham sharmā huzūrī meñ

us ke saath daañt nikāl kar hañste haiñ

phir ham us qabristān meñ jaate haiñ

jahāñ ham ko dafn kiyā jā.egā

aur dekhte haiñ

kyā koī jagah baaqī hai

qabristān to paTā huā miltā hai

ham ḳhush hote haiñ

mārne vaale hameñ nahīñ māreñge

jab un ko ye patā hogā ki

qabristān meñ ab jagah nahīñ rahī

ham lahakte hue qabristān se bāhar aa ga.e

magar rāste meñ

ek golī hameñ Thumaktī huī nazar aa.ī

ham saḌak par leTe hue

soch rahe the

apnī āḳhirī saañs ke darmiyān

is ko mālūm nahīñ thā kyā

qabristān meñ ab jagah nahīñ hai

maut hum se kitni dur hai

ek inchi-tape KHarid kar lae hain hum

aur farzi fasle se maut ko

apne aap se napte hain

din ko good-morning kahte hue

suraj ki raushni se hum puchhte hain

aaj kya hamara number hai

suraj khilkhilata hai hamari buzdili par

hamein us ki hansi zahr lagti hai

lekin hum sharma huzuri mein

us ke sath dant nikal kar hanste hain

phir hum us qabristan mein jate hain

jahan hum ko dafn kiya jaega

aur dekhte hain

kya koi jagah baqi hai

qabristan to paTa hua milta hai

hum KHush hote hain

marne wale hamein nahin marenge

jab un ko ye pata hoga ki

qabristan mein ab jagah nahin rahi

hum lahakte hue qabristan se bahar aa gae

magar raste mein

ek goli hamein Thumakti hui nazar aai

hum saDak par leTe hue

soch rahe the

apni aaKHiri sans ke darmiyan

is ko malum nahin tha kya

qabristan mein ab jagah nahin hai