hum zamin-zad

hamāre pairoñ ke chhāle phūTeñ

to in ke nam se

ġhubār rastoñ kā baiThtā hai

hamāre ḳhvāboñ kā ḳhuun pī kar ye sabz-rangī ruteñ javāñ haiñ

hamāre sar kaaT kar asās-e-falak meñ jab tak dhare na jaa.eñ

khaḌā na rah paa.e ek pal bhī

hamārī poroñ ne qatra qatra lahū diyā hai

to varaq-e-jāñ surḳh-gūñ huā hai

hamāre ashkoñ ne har lab-e-dasht ko chhuā hai

to tar huā hai

hamī haiñ vaj.h-e-jamāl-e-hastī

hamāre hone se irtiqā hai

vagarna is kār-gāh meñ kuchh

kamāl-e-kun-fa-yakūn kyā hai

hamare pairon ke chhaale phuTen

to in ke nam se

ghubar raston ka baiThta hai

hamare KHwabon ka KHun pi kar ye sabz-rangi ruten jawan hain

hamare sar kaT kar asas-e-falak mein jab tak dhare na jaen

khaDa na rah pae ek pal bhi

hamari poron ne qatra qatra lahu diya hai

to waraq-e-jaan surKH-gun hua hai

hamare ashkon ne har lab-e-dasht ko chhua hai

to tar hua hai

hami hain wajh-e-jamal-e-hasti

hamare hone se irtiqa hai

wagarna is kar-gah mein kuchh

kamal-e-kun-fa-yakun kya hai