hamare shajre bikhar gae hain

gumāñ kī be-rañg sā.atoñ meñ

navāh-e-karb-o-balā se darbār-e-shām tak ham

lahū kī ik ek buuñd kā sab ḳhirāj de kar

tamām qarze chukāte aa.e

shikasta dahlīz

lahū kī mehrāb

sināñ kā mimbar

hamārī izzat baḌhāte aa.e

vo ham hī the jo qayām karte

rukūa meñ jhukte

zakāt de kar

ḳhud apne hisse kā ta.aam de kar

darūd o salāt paḌhte aa.e

vo ham the jo gharoñ se nikle

to phir abad tak

palaT ke ghar kī taraf na dekhā

sitāra-e-saharī gavāh hai

ki ham ne insāñ ko

chhāñv dete

ghanere peḌoñ pe ḳhuun chhiḌkā

jhulaste sahrā ko tāzgī dī

dahaktī dhartī ko zindagī dī

magar vo taskīñ kā pul kahāñ hai

bhañvar bhañvar hai zamāna saarā

vajūd apne kidhar ga.e haiñ

hamāre shajre bikhar ga.e haiñ

guman ki be-rang saaton mein

nawah-e-karb-o-bala se darbar-e-sham tak hum

lahu ki ek ek bund ka sab KHiraj de kar

tamam qarze chukate aae

shikasta dahliz

lahu ki mehrab

sinan ka mimbar

hamari izzat baDhate aae

wo hum hi the jo qayam karte

rukua mein jhukte

zakat de kar

KHud apne hisse ka taam de kar

darud o salat paDhte aae

wo hum the jo gharon se nikle

to phir abad tak

palaT ke ghar ki taraf na dekha

sitara-e-sahari gawah hai

ki hum ne insan ko

chhanw dete

ghanere peDon pe KHun chhiDka

jhulaste sahra ko tazgi di

dahakti dharti ko zindagi di

magar wo taskin ka pul kahan hai

bhanwar bhanwar hai zamana sara

wajud apne kidhar gae hain

hamare shajre bikhar gae hain