hamesha ke liye

sūraj kī pahlī kiran

jab band palkoñ par dastak detī hai

jaise kahtī ho

ek aur din tumhāre naam kiyā hai

aur vo chāñd

jo raat kī namī meñ

saarī tanhā.iyāñ sameT letā hai

jaise koī purānā dost

jo kuchh kahe binā bhī bahut kuchh kah jaatā hai

ye peḌ ye patte

ye havā kā dhīme se gāloñ ko chhū jaanā

kisī jharne kā duur se aatā

suroñ jaisā bahāv

ye sab jaise ḳhudā ne fursat meñ banāyā ho

taaki ham bas dekheñ

mahsūs kareñ

aur shukr adā kareñ

par dekhnā abhī baaqī hai

abhī to bahut kuchh honā hai

mere bachchoñ ko baḌā hote dekhnā hai

unheñ apnī pahchān banāte

apne ḳhvāboñ meñ merā naam joḌte dekhnā hai

koī na.ī khoj ho koī jang ḳhatm ho

koī jhanḌī lahrā.e

kisī shāntī kī

kisī kī āñkhoñ meñ ab bhī

mohabbat kī pahlī chamak dekhnī hai

kyā ye sab dekhe binā

chale jaanā zarūrī hai

kyā ham bas isī liye aa.e the

ki ek din lauT jaa.eñ

binā puure hue

binā dekhe hue

kaash

maiñ ek shāḳh par baiThā rah sakūñ

kisī dhuup kī kiran meñ

kisī khiḌkī se jhāñktā rah sakūñ

binā āvāz ke

bas maujūd rah sakūñ

dekhne ke liye

kyā ham yahīñ nahīñ rah sakte

sirf dekhne ke liye

sirf mahsūs karne ke liye

binā kisī vaqt kī bandish ke

binā kisī ke Dar ke

bas

rah jaa.eñ yahāñ

ek peḌ kī tarah

ek raushnī kī tarah

ek saañs kī tarah

aur agar ye mumkin nahīñ

ki ham yahīñ rah sakeñ hamesha ke liye

to chalo yuuñ kareñ

har pal ko vaise jī leñ

jaise ham yahīñ raheñge

hamesha ke liye

suraj ki pahli kiran

jab band palkon par dastak deti hai

jaise kahti ho

ek aur din tumhaare nam kiya hai

aur wo chand

jo raat ki nami mein

sari tanhaiyan sameT leta hai

jaise koi purana dost

jo kuchh kahe bina bhi bahut kuchh kah jata hai

ye peD ye patte

ye hawa ka dhime se galon ko chhu jaana

kisi jharne ka dur se aata

suron jaisa bahaw

ye sab jaise KHuda ne fursat mein banaya ho

taki hum bas dekhen

mahsus karen

aur shukr ada karen

par dekhna abhi baqi hai

abhi to bahut kuchh hona hai

mere bachchon ko baDa hote dekhna hai

unhen apni pahchan banate

apne KHwabon mein mera nam joDte dekhna hai

koi nai khoj ho koi jang KHatm ho

koi jhanDi lahrae

kisi shanti ki

kisi ki aankhon mein ab bhi

mohabbat ki pahli chamak dekhni hai

kya ye sab dekhe bina

chale jaana zaruri hai

kya hum bas isi liye aae the

ki ek din lauT jaen

bina pure hue

bina dekhe hue

kash

main ek shaKH par baiTha rah sakun

kisi dhup ki kiran mein

kisi khiDki se jhankta rah sakun

bina aawaz ke

bas maujud rah sakun

dekhne ke liye

kya hum yahin nahin rah sakte

sirf dekhne ke liye

sirf mahsus karne ke liye

bina kisi waqt ki bandish ke

bina kisi ke Dar ke

bas

rah jaen yahan

ek peD ki tarah

ek raushni ki tarah

ek sans ki tarah

aur agar ye mumkin nahin

ki hum yahin rah saken hamesha ke liye

to chalo yun karen

har pal ko waise ji len

jaise hum yahin rahenge

hamesha ke liye