har aaina ek aks-e-nau DhunDta hai

har ā.īna ik aks-e-nau DhūñDtā hai

samundar kī lahreñ hoñ yā dasht kī an-ginat pattiyāñ

sab yahī sochtī haiñ

ki koī na.ī ruuh in meñ samā jaa.e

uḌte hue abr-pāre musalsal

tulū-e-sahar se numūd-e-shafaq tak

koī samt-e-nau DhūñDte haiñ

ufuq tā ufuq chāñdnī

raat ke dāman-e-be-karāñ meñ

na.ī sā.atoñ ke nishāñ DhūñDhtī hai

talāsh-e-musalsal kī bahtī huī rau meñ ik kaah bhī hai

jo sadiyoñ se is aas meñ bah rahā hai

ki shāyad koī quvvat-e-kahrubā.ī

kisī samt se nā-gahāñ aa ke

āġhosh meñ jazb kar le

magar aarzū kī rasā.ī se bāhar

abhī an-ginat marhale raah meñ haiñ

abhī justujū avvalīñ manziloñ kī hadeñ

paar kartī chalī jā rahī hai

abhī soch kī ibtidā-e-safar hai!

har aaina ek aks-e-nau DhunDta hai

samundar ki lahren hon ya dasht ki an-ginat pattiyan

sab yahi sochti hain

ki koi nai ruh in mein sama jae

uDte hue abr-pare musalsal

tulu-e-sahar se numud-e-shafaq tak

koi samt-e-nau DhunDte hain

ufuq ta ufuq chandni

raat ke daman-e-be-karan mein

nai saaton ke nishan DhunDhti hai

talash-e-musalsal ki bahti hui rau mein ek kah bhi hai

jo sadiyon se is aas mein bah raha hai

ki shayad koi quwwat-e-kahrubai

kisi samt se na-gahan aa ke

aaghosh mein jazb kar le

magar aarzu ki rasai se bahar

abhi an-ginat marhale rah mein hain

abhi justuju awwalin manzilon ki haden

par karti chali ja rahi hai

abhi soch ki ibtida-e-safar hai!