harif-e-visal

ajiib shab thī

jo ek pal meñ simaT ga.ī thī

ajiib pal thā

jo sāl-hā-sāl kī masāfat pe par-fishāñ thā

aur us ke saa.e meñ ek mausam Thahar gayā thā

(kisī ke dil meñ thā kyā kisī ko ḳhabar nahīñ thii)

bas ek aalam supurdagī kā

bas ek dariyā-e-tishnagī thā ki jis kī maujeñ

umaD umaD kar bikhar rahī thiiñ

khule samundar meñ Duub jaane kī aarzū meñ machal rahī thiiñ

ḳhayāl husn-e-ḳhayāl meñ gum

nigāh ḳhvāb-e-jamāl meñ gum

na jaane kis ḳhvāb kī ye ta.abīr thī ki āñkhoñ meñ jāgtī thī

na jaane kis aarzū kī takmīl ho rahī thī

ki aañkh se aañkh

lab se lab mahv-e-guftugū the

magar bas ik baat mo'tabar thī

kisī ke dil meñ thā kyā kisī ko ḳhabar nahīñ thī

vo lamha guzrā ki sehr TuuTā

yakā-yak ehsās-e-umr jaagā

har ek chehra ḳhud apnī āñkhoñ meñ ā.īna ho gayā ho jaise

tilism-e-sim-sim se jis ḳhazāne kā dar khulā thā

vo yak-ba-yak kho gayā ho jaise

ajiib thā ek chor dil meñ

jo is ḳhazāne kā pāsbāñ thā

jo saa.e kī tarah darmiyāñ thā

taqāza-e-māh-o-sāl thā vo?

ki dil kī gahrā.iyoñ meñ bedār

koī ḳhauf-e-ma.āl thā vo?

ajiib sā ik ḳhayāl thā vo

hujūm-e-jazbāt meñ dar aayā thā jo harīf-e-visāl ban kar

jo dil kī dhaḌkan meñ ruk gayā thā zamīr kā ik savāl ban kar

ajib shab thi

jo ek pal mein simaT gai thi

ajib pal tha

jo sal-ha-sal ki masafat pe par-fishan tha

aur us ke sae mein ek mausam Thahar gaya tha

(kisi ke dil mein tha kya kisi ko KHabar nahin thi)

bas ek aalam supurdagi ka

bas ek dariya-e-tishnagi tha ki jis ki maujen

umaD umaD kar bikhar rahi thin

khule samundar mein Dub jaane ki aarzu mein machal rahi thin

KHayal husn-e-KHayal mein gum

nigah KHwab-e-jamal mein gum

na jaane kis KHwab ki ye tabir thi ki aankhon mein jagti thi

na jaane kis aarzu ki takmil ho rahi thi

ki aankh se aankh

lab se lab mahw-e-guftugu the

magar bas ek baat mo'tabar thi

kisi ke dil mein tha kya kisi ko KHabar nahin thi

wo lamha guzra ki sehr TuTa

yaka-yak ehsas-e-umr jaga

har ek chehra KHud apni aankhon mein aaina ho gaya ho jaise

tilism-e-sim-sim se jis KHazane ka dar khula tha

wo yak-ba-yak kho gaya ho jaise

ajib tha ek chor dil mein

jo is KHazane ka pasban tha

jo sae ki tarah darmiyan tha

taqaza-e-mah-o-sal tha wo?

ki dil ki gahraiyon mein bedar

koi KHauf-e-maal tha wo?

ajib sa ek KHayal tha wo

hujum-e-jazbaat mein dar aaya tha jo harif-e-visal ban kar

jo dil ki dhaDkan mein ruk gaya tha zamir ka ek sawal ban kar